Շարմազանով. ՀՀ նպատակն է, որ ԼՂՀ ժողովուրդը կարողանա օգտվել իր միջազգային իրավունքից

PanARMENIAN.Net - Այս պահին հայկական կողմը գնում է հակառակորդին խաղաղություն պարտադրելու և ԼՂՀ միջազգային ճանաչման ուղով: Այդ մասին ԱԺ-ում լրագրողների հետ զրույցում հայտարարել է ԱԺ փոխխոսնակ Էդուարդ Շարմազանովը, հայտնում է Tert.am-ը:

«Մեր նպատակը երբեք չի եղել միակողմանի ճանաչում, մեր նպատակն է, որ ԼՂՀ ժողովուրդը կարողանա օգտվել իր միջազգային իրավունքից՝ միջազգային նորմերին համապատասխան, Մինսկի խմբի նորմերին ու սկզբունքներին համապատասխան»,- ասաց նա:

Շարմազանովը նշեց, թե Արցախի ԱԳ նախարարը հստակ ասել է, որ իրենց նպատակն է միջազգային ճանաչման հասնել և ըստ այդմ էլ, ՀՀ-ն՝ որպես Արցախի Հանրապետության անվտանգության երաշխավոր, անելու է ամեն ինչ, որ Արցախի ժողովուրդն ապրի անվտանգ և ազատ ու անկախ երկրում:

Հարցին, թե ՌԴ-ի՝ որպես ռազմավարական դաշնակցի, արձագանքը ինչքանով է բավարար համարում, Շարմազանովը նշել է, որ խմբակցությունների հետ ընդհանուր հայտարարությամբ էլ ասել են, որ հայկական կողմին չեն բավարարում հավասարեցման նշան դրվող գնահատականները՝ անկախ նրանից, թե ով է տալիս:

«Մեր վեց խմբակցությունների հայտարարության մեջ հստակ ասվում էր, որ ի վերջո, պետք է դահիճն անվանվի դահիճ, հանցագործն ուղիղ անվանվի հանցագործ: ՌԴ-ում Ադրբեջանի դեսպան Փոլադ Բյուլբյուլօղլին բաց հրապարակային ասել է, որ իրենք են սկսել և Մինսկի խմբի համանախագահները շատ լավ գիտեն, թե ով է սկսել, և այդ երկրները գոնե ունեն բազում տեխնիկական հնարավորություններ՝ պարզելու, թե ով է ագրեսիայի և ահաբեկչության հիմնադիրը, ով է լարում իրավիճակը և հավասարության նշան դրվող որևէ հայտարարություն՝ անկախ դա Լոս Անջելեսից է, Սան Ֆրանցիսկոյից, Մոսկվայից, Փարիզից, թե Վիեննայից, չի կարող օժանդակել այս կարգավորմանը: Հավասարության նշան դնելն անթույլատրելի է»,- ասել է նա:

Շարմազանովը նշել է, որ առաջնային ակնկալիքն է, որ ԼՂՀ պաշտպանության բանակը խաղաղություն պարտադրի հակառակորդին, մնացածն արդեն աստիճանաբար կիրականացնեն:

Նա շնորհակալություն է հայտնել նաև բոլոր քաղաքական ուժերին միասնական դիրքորոշում ունենալու համար: «Այսօր այն պահն է, որ մեզ պետք է կոնսոլիդացիա: Այսօր չկա իշխանություն և ընդդիմություն: Մեր պայմանավորվածությամբ որոշել ենք այս քառօրյայում լինել ավելի զուսպ: Ինձ համար այսօր երկրորդական է, ով որ կուսակցությունից է, բոլորս հայ ենք և ԼՂՀ ներկայացուցիչ»,- ասել է նա:

Ապրիլի լույս 2-ի գիշերից ղարաբաղա-ադրբեջանական շփման գծում շարունակվող մարտերում ՊԲ ստորաբաժանումները, ըստ ԼՂՀ ՊՆ տվյալների, ոչնչացրել են հայկական դիրքերի ուղղությամբ գրոհող թշնամական 2 ուղղաթիռ, ինչպես նաև 6 անօդաչու թռչող սարք (ԱԹՍ), 20 տանկ, 5 զրահամեքենա 1 ՏՕՍ ծանր հրանետային համակարգ: Ադրբեջանն ընդունել է 15 զինծառայողի զոհվելու, ինչպես նաև 1 տանկի ու 1 ուղղաթիռի ոչնչացման փաստը և չի հայտնել ոչ մի վիրավորի մասին՝ այն դեպքում, երբ միայն հայկական կողմի հրապարակած ֆոտո- և տեսանյութերում առկա են մի քանի տասնյակ դիակներ, 1 ուղղաթիռ և 2 ԱԹՍ:

Հայկական կողմից զոհվել է 18 զինծառայող, մոտ 37-ը վիրավոր է: Հայկական կողմը նաև կորցրել է մեկ տանկ: Բացի առաջնագծում ընթացող մարտերից, հակառակորդը հրթիռահրետանային հարվածներ է հասցրել խաղաղ բնակավայրերին: Մարտունիում դպրոցի հրետակոծման հետևանքով զոհվել է 12-ամյա երեխա, 3 տարեց մարդ դաժանաբար սպանվել է Թալիշ գյուղում: Եվս 6 քացաքացիական, որոնցից երկուսը երեխա էին, վիրավորվել են:

Ընթերցեք նաև. Լավրով. Ռուսաստանը չի մեղադրում Անկարային Ղարաբաղում իրավիճակը սրելու մեջ