ԼՂՀ ՊՆ. ԵԱՀԿ Մինսկի խմբի համանախագահներին կխնդրեինք դատել փաստերով

PanARMENIAN.Net - ԼՂՀ ՊՆ-ն հանդես է եկել հայտարարությամբ` անդրադառնալով ապրիլի 6-ին ԵԱՀԿ Մինսկի խմբի համանախագահների հետ ունեցած հանդիպման ժամանակ Ադրբեջանի պաշտպանության նախարարի արտահայտած այն մտքին, որ «ի տարբերություն հակառակորդի՝ մենք չենք կռվում կանանց և երեխաների հետ»: ԼՂՀ ՊՆ-ն դա որակում է որպես ցինիկության գագաթնակետ, մանավանդ, հաշվի առնելով տարեցների դաժան սպանությունը վկայող փաստերը:

ԼՂՀ ՊՆ-ն հղում է անում լուսանկարին, որտեղ պատկերված են ԼՂՀ Մարտակերտի շրջանի Թալիշ գյուղի տարեցներ Վալերա և Ռազմելա Խալափյանները, որոնց Ադրբեջանի «հումանիստ» նախարար Հասանովի ղեկվարած «հզոր բանակի» ասկյարները բարբարոսաբար գնդակահարել, իսկ այնուհետև վայրենի մոլուցքով կտրել են նրանց ականջները…

«Այսքանից հետո, թե ով է «կռվում կանանց և երեխաների հետ» և ազնվության ինչպիսի որակներով է օժտված նախկին ոստիկանապետ, իսկ այսօր իրեն պաշտպանության նախարար համարող Զաքիր Ասկեր օղլու Հասանովը, ԵԱՀԿ Մինսկի խմբի համանախագահներին կխնդրեինք դատել փաստերով»,-ասվոմ է ԼՂՀ ՊՆ հայտարարության մեջ:

Ապրիլի լույս 2-ի գիշերից ապրիլի 5-ը ղարաբաղա-ադրբեջանական շփման գծում շարունակվող մարտերի ընթացքում ադրբեջանական դիվերսիոն խմբին հաջողվել էր կարճ ժամանակով մտնել Թալիշ, որտեղ նրանք դաժան հաշվեհարդար էին տեսել գյուղում մնացած 3 զառամյալ ծերունիների հետ: Ադրբեջանցի հատուկջոկատայինների կողմից Թալիշ գյուղում իրականացված տարեցների դաժան սպանությունը որակում է որպես պատերազմական հանցագործություն:

Այդ ընթացքում ըստ ԼՂՀ ՊՆ տվյալների, ՊԲ ստորաբաժանումները ոչնչացրել են հայկական դիրքերի ուղղությամբ գրոհող թշնամական 2 ուղղաթիռ, ինչպես նաև 26 տանկ, 4 ՀՄՄ, 1 «Գրադ», ինժեներական 1 մեքենա և 12 ԱԹՍ:

Ադրբեջանն ընդունել է 31 զինծառայողի զոհվելու, ինչպես նաև 1 տանկի ու 1 ուղղաթիռի ոչնչացման փաստը և չի հայտնել ոչ մի վիրավորի մասին՝ այն դեպքում, երբ միայն հայկական կողմի հրապարակած ֆոտո- և տեսանյութերում առկա են մի քանի տասնյակ դիակներ, 1 ուղղաթիռ և 3 ԱԹՍ: Ստեփանակերտի գնահատականով, Ադրբեջանի ընդհանուր կորուստները գերազանցում են 300-ը:

Հայկական կողմն ունի 33 զոհ, 121-ը վիրավորվել է, 25-ն անհետ կորած են: ՊԲ-ն նաև 14 տանկ է կորցրել:

Ապրիլի 5-ին Մոսկվայում Հայաստանի ու Ադրբեջանի ԶՈւ գլխավոր շտաբերի պետերի միջև ժամը 12:00-ից կրակի դադարեցման մասին երկկողմանի պայմանավորվածություն է ձեռք բերվել՝ բանակցություններ անցկացնելու պայմանով: