Բոստոնում տեղադրված Հայոց ցեղասպանությունը ժխտող վահանակը հեռացվել է

12 ապրիլի 2016 - 11:09 AMT

PanARMENIAN.Net - Ստամբուլի «Թուրքական պլատֆորմի» կողմից ԱՄՆ-ի Բոստոն քաղաքի Նորթ Էնդ արվարձանում տեղադրված Հայոց ցեղասպանությունը ժխտող գովազդային վահանակը հանվել է: Այն տեղադրվել էր ՀՀ նախագահ Սերժ Սարգսյանի՝ ԱՄՆ կատարած այցից անմիջապես հետո:

Վահանակը տեղադրվել էր Բոստոնի Հայկական ժառանգության այգուց ընդամենը մի քանի թաղամաս հեռավորության վրա: «Ճշմարտություն = Խաղաղություն» վերտառությամբ վահանակը պատկերում էր Ռուսաստանի, Թուրքիայի և Հայաստանի դրոշների գույներով ներկված երեք ձեռք: Ընդ որում, Թուրքիան խորհրդանշող ձեռքը հաղթանակի ժեստ էր ցուցադրում, իսկ Ռուսաստանն ու Հայաստանը խորհրդանշող ձեռքերը խաչել էին մատներն՝ իբր ստելիս, Sabah-ին հղումով գրում է Ermenihaber.am-ը:

Սոցմեդիայում թուրքական ցուցապաստառի դեմ սկիզբ առած բողոքի ակցիայի արդյունքում գովազդային ընկերությունը հեռացրել է ցուցանակը:

Ստամբուլի «Թուրքական պլատֆորմի» ներկայացուցիչները հայտնել են, որ մինչև ապրիլի 24-ը պատրաստվում են ևս 100 նմանատիպ ցուցանակ տեղադրել ԱՄՆ-ի տարբեր վայրերում:

2015-ին ևս «Թուրքական պլատֆորմը» վճարել էր նմանատիպ գովազդի տեղադրման համար, սակայն քննադատությունների ալիքը ստիպել էր հեռացնել այն:

Ուոթերթաունի Սբ Հակոբ հայ առաքելական եկեղեցու Ամերիկայի եկեղեցական երիտասարդական կազմակերպության նախագահ Ահարոն Դերդերյանը թեմայի վերաբերյալ հետևյալ մեկնաբանություն է արել. «Հայոց ցեղասպանությունը ժխտող այս վահանակը ոչ մի բանով չի տարբերվում և նույնչափ վիրավորական է, որքան Հոլոքոստը մերժելը»:

Հայոց ցեղասպանությունից փրկված մեծ թվով հայեր արտագաղթել էին ԱՄՆ, մասնավորապես՝ Բոստոն և Ուոթերթաուն: Ներկայումս մոտ 25.000 հայ բնակվում է Մասաչուսեթսում, որն իր բնակչության թվով ԱՄՆ -ի նահանգների շարքում երկրորդն է:

Հղումներ թեմայով.

Բոստոնում հեռացվել է Հայոց ցեղասպանությունը ժխտող թուրքական վահանակը. Ermenihaber.am

Հայոց ցեղասպանություն

Հայոց ցեղասպանությունը, որն իրագործվել է Օսմանյան կայսրությունում 1915-1923թթ., XX դարի առաջին ցեղասպանությունն էր, որի նախաձեռնողները երիտթուրքերն էին: Ցեղասպանության ժամանակ ոչնչացվեց վեց հայկական վիլայեթների բնակչությունը` մոտ 1,5 մլն հայ: Եվս կես միլիոնը սփռվեց աշխարհով մեկ` սկիզբ դնելով հայկական Սփյուռքին:

Դեռևս Ցեղասպանության իրագործման տարիներին` 1915-23թթ. տերությունները ընդունեցին հայերի կոտորածը դատապարտող բանաձևեր: ԱՄՆ-ն երեք անգամ (1916, 1919, 1920) նմանատիպ բանաձևեր է ընդունել, սակայն դա չկասեցրեց Օսմանյան կայսրության գործողությունները: 1915թ. Ֆրանսիան, Մեծ Բրիտանիան և Ռուսաստանը հանդես եկան համատեղ հռչակագրով` դատապարտելով հայերի բնաջնջումը:

Աշխարհի շատ երկրներ և ազդեցիկ միջազգային կազմակերպություններ ճանաչել և դատապարտել են Հայոց ցեղասպանությունը: Պաշտոնապես առաջինը Հայոց ցեղասպանությունն ընդունել և դատապարտել է Ուրուգվայը 1965թ-ին: Հայոց ցեղասպանությունը ճանաչել են նաև Եվրոպայի Խորհուրդը, Եվրախորհրդարանը, ՄԱԿ-ի խտրականության կասեցման և փոքրամասնությունների պաշտպանության կանխարգելման ենթահանձնաժողովը, ՄԱԿ-ի ռազմական հանցագործությունների գծով հանձնաժողովը, Եկեղեցիների համաշխարհային խորհուրդը: Հայերի ոչնչացումը պաշտոնապես ցեղասպանություն են ճանաչել Ֆրանսիան, Ավստրիան, Իտալիան, Գերմանիան, Բելգիան, Լյուքսեմբուրգը, Շվեդիան, Նիդերլանդները, Շվեյցարիան, Ռուսաստանը, Լեհաստանը, Լիտվան, Հունաստանը, Սլովակիան, Կիպրոսի Հանրապետությունը, Լիբանանը, Ուրուգվայը, Արգենտինան, Վենեսուելան, Չիլին, Բոլիվիան, Կանադան, Վատիկանը, Բրազիլիան, Լյուքսեմբուրգը, Գերմանիան, Պարագվայը, Սիրիան և ԱՄՆ-ի 45 նահանգ:

Բելգիայում և Շվեդիայում Հայոց ցեղասպանության ժխտման համար քրեական պատասխանատվություն է սահմանված (45 հազար եվրո տուգանքից մինչև 1 տարվա ազատազրկում): 2006թ. հոկտեմբերի 12-ին Ֆրանսիայի խորհրդարանն օրինագիծ ընդունեց, որի համաձայն Հայոց ցեղասպանության ժխտումը կքրեականացվի, ինչպես Հոլոքոսթը:

Ժամանակակից Թուրքիան ժխտում է Հայոց ցեղասպանության պատմական փաստը և վարում է այդ փաստի ժխտման ներքին և արտաքին քաղաքականություն: Թուրքական պետության գործողությունները ներկայացվում են որպես «բռնագաղթ»` հայերի անվտանգությունն ապահովելու նպատակով: Հայոց ցեղասպանության ճանաչման անհրաժեշտության մասին խոսում են միայն առանձին թուրք մտավորականներ, որոնց թվում են պատմաբան Թաներ Աքչամն ու Նոբելյան մրցանակի դափնեկիր Օրհան Փամուկը: