Ռուսաստանցիները` ԼՂ հակամարտության մասին. 6%-ը սատարում է Երևանին, 1%-ը` Բաքվին

15 ապրիլի 2016 - 17:08 AMT

PanARMENIAN.Net - Ռուսաստանցիների երեք քառորդը այս կամ այն չափով իրազեկված է այն մասին, որ ապրիլի սկզբին բազմամյա հրադադարից հետ վերսկսվել է զինված հակամարտությունը ղարաբաղա-ադրբեջանական զորքերի շփման գծում, հայտնում է «Հասարակական կարծիքը»: Հարցման մասնակիցների 52%-ը կարծում է, որ Մոսկվան չպետք է սատարի կողմերից ոչ մեկին:

Հակամարտության մասին առաջին անգամ է լսել հարցման մասնակիցների միայն 23%-ը: Հարցումն անցկացվել է ապրիլի 9-10-ը 1500 մասնակիցների շրջանում ՌԴ 53 սուբյեկտի 104 բնակավայրում:

Անդրադառնալով այս հարցում Ռուսաստանի դիրքորոշմանը` հարցվածների 6%-ը կողմ է արտահայտվել Հայաստանին աջակցելուն, 1%-ը` Ադրբեջանին: Դժվարացել է պատասխանել հարցվածների 23%-ը:

Ըստ հարցման արդյունքների, մասնակիցների 40%-ը համարում է, որ Ռուսաստանը պետք է անի իրենից կախված ամեն բան կասեցնելու համար հակամարտությունը: Միևնույն ժամանակ 30%-ը վստահ է, որ Ռուսաստանը չպետք է մեծ ակտիվություն ցուցաբերի այս հարցում: Յուրաքանչյուր տասներորդը` 11 տոկոսը, դժվարացել է պատասխանել, հայտնում է Ինտերֆաքսը:

Ապրիլի լույս 2-ի գիշերից ապրիլի 5-ը ղարաբաղա-ադրբեջանական շփման գծում շարունակվող մարտերում ՊԲ ստորաբաժանումները, ըստ ԼՂՀ ՊՆ տվյալների, ոչնչացրել են հայկական դիրքերի ուղղությամբ գրոհող թշնամական 2 ուղղաթիռ, ինչպես նաև 26 տանկ, 4 ՀՄՄ, 1 «Գրադ», ինժեներական 1 մեքենա և 14 ԱԹՍ: Ադրբեջանական կողմի նախաձեռնությամբ և ռուսական կողմի միջնորդությամբ ղարաբաղա-ադրբեջանական հակամարտ զորքերի շփման գծում կրակի ռեժիմի դադարեցման մասին պայմանավորվածություն է ձեռք բերվել: Ստեփանակերտի գնահատականով, Ադրբեջանի ընդհանուր կորուստները գերազանցում են 300-ը:

Հայկական կողմն ունի 77 մարտական կորուստ, սպանվել է 4 խաղաղ բնակիչ. 122 զինծառայող վիրավորվել է, 1-ն անհետ կորած է:

Հղումներ թեմայով.

Интерфакс: Более половины россиян высказались за нейтралитет РФ в карабахском конфликте