Չիկագոյում միջոցառումներ կանցնեն` նվիրված Հայոց ցեղասպանության տարելիցին

22 ապրիլի 2016 - 15:35 AMT

PanARMENIAN.Net - Չիկագոյի հայ համայնքը մի շարք միջոցառումներ է կազմակերպել` նվիրված Հայոց ցեղասպանության 101-րդ տարելիցին: Տեղի կունենան ցույցեր, կմատուցվի պատարագ, ոգեկոչման արարողություն, հայտնում է Armenian Weekly-ն:

Ապրիլի 22-ին ցույց տեղի կունենա Չիկագոյում թուրքական հյուպատոսության առջև: Հայ երիտասարդական «Արարատ» միությունը ցույցի կազմակերպիչն է և կոչ է արել համայնքի անդամներին մասնակցել թուրքական ժխտողականության դեմ բողոքին:

Ապրիլի 23-ին տեղի կունենա «Հայոց ցեղասպանություն 101. Հաջորդ գլուխը սկսվում է մեր երիտասարդներից» վերտառությամբ ոգեկոչման միջոցառումը, որի հովանավորն է Իլինոյսի Հայ Դատի հանձնախումբը: Միջոցառման ավարտին մասնակիցները մոմեր կվառեն ի հիշատակ անմեղ զոհերի: Միջոցառումը տեղի կունենա Ամենափրկիչ հայկական եկեղեցում:

Ապրիլի 24-ին նույն եկեղեցում կմատուցվի պատարագ, որին կհաջորդի ոգեկոչման միջոցառումը: Մասնակիցների թվում են ԱՄՆ կոնգրեսական Բոբ Դոլդը, նահանգի սենատոր Դենիել Բիսը, նահանգի ներկայացուցիչ Լաուրա Ֆայնը, Կոնգրեսի անդամության թեկնածու Ռաջա Կրիշնամուրտին և ԱՄՆ այլ ազդեցիկ քաղաքական գործիչներ:

Հղումներ թեմայով.

The Armenian Weekly. Armenian Genocide Commemoration Events to Be Held in Chicago

Հայոց ցեղասպանություն

Հայոց ցեղասպանությունը, որն իրագործվել է Օսմանյան կայսրությունում 1915-1923թթ., XX դարի առաջին ցեղասպանությունն էր, որի նախաձեռնողները երիտթուրքերն էին: Ցեղասպանության ժամանակ ոչնչացվեց վեց հայկական վիլայեթների բնակչությունը` մոտ 1,5 մլն հայ: Եվս կես միլիոնը սփռվեց աշխարհով մեկ` սկիզբ դնելով հայկական Սփյուռքին:

Դեռևս Ցեղասպանության իրագործման տարիներին` 1915-23թթ. տերությունները ընդունեցին հայերի կոտորածը դատապարտող բանաձևեր: ԱՄՆ-ն երեք անգամ (1916, 1919, 1920) նմանատիպ բանաձևեր է ընդունել, սակայն դա չկասեցրեց Օսմանյան կայսրության գործողությունները: 1915թ. Ֆրանսիան, Մեծ Բրիտանիան և Ռուսաստանը հանդես եկան համատեղ հռչակագրով` դատապարտելով հայերի բնաջնջումը:

Աշխարհի շատ երկրներ և ազդեցիկ միջազգային կազմակերպություններ ճանաչել և դատապարտել են Հայոց ցեղասպանությունը: Պաշտոնապես առաջինը Հայոց ցեղասպանությունն ընդունել և դատապարտել է Ուրուգվայը 1965թ-ին: Հայոց ցեղասպանությունը ճանաչել են նաև Եվրոպայի Խորհուրդը, Եվրախորհրդարանը, ՄԱԿ-ի խտրականության կասեցման և փոքրամասնությունների պաշտպանության կանխարգելման ենթահանձնաժողովը, ՄԱԿ-ի ռազմական հանցագործությունների գծով հանձնաժողովը, Եկեղեցիների համաշխարհային խորհուրդը: Հայերի ոչնչացումը պաշտոնապես ցեղասպանություն են ճանաչել Ֆրանսիան, Ավստրիան, Իտալիան, Գերմանիան, Բելգիան, Լյուքսեմբուրգը, Շվեդիան, Նիդերլանդները, Շվեյցարիան, Ռուսաստանը, Լեհաստանը, Լիտվան, Հունաստանը, Սլովակիան, Կիպրոսի Հանրապետությունը, Լիբանանը, Ուրուգվայը, Արգենտինան, Վենեսուելան, Չիլին, Բոլիվիան, Կանադան, Վատիկանը, Բրազիլիան, Լյուքսեմբուրգը, Գերմանիան, Պարագվայը, Սիրիան և ԱՄՆ-ի 45 նահանգ:

Բելգիայում և Շվեդիայում Հայոց ցեղասպանության ժխտման համար քրեական պատասխանատվություն է սահմանված (45 հազար եվրո տուգանքից մինչև 1 տարվա ազատազրկում): 2006թ. հոկտեմբերի 12-ին Ֆրանսիայի խորհրդարանն օրինագիծ ընդունեց, որի համաձայն Հայոց ցեղասպանության ժխտումը կքրեականացվի, ինչպես Հոլոքոսթը:

Ժամանակակից Թուրքիան ժխտում է Հայոց ցեղասպանության պատմական փաստը և վարում է այդ փաստի ժխտման ներքին և արտաքին քաղաքականություն: Թուրքական պետության գործողությունները ներկայացվում են որպես «բռնագաղթ»` հայերի անվտանգությունն ապահովելու նպատակով: Հայոց ցեղասպանության ճանաչման անհրաժեշտության մասին խոսում են միայն առանձին թուրք մտավորականներ, որոնց թվում են պատմաբան Թաներ Աքչամն ու Նոբելյան մրցանակի դափնեկիր Օրհան Փամուկը: