Թավջութակահար Հախնազարյանը ելույթ է ունենալու Հոնկոնգում

PanARMENIAN.Net - Թավջութակահար Նարեկ Հախնազարյանը մայիսի 10-ին ելույթ է ունենալու Հոնկոնգում: Նրա հետ հանդես է գալու ամերիկացի դաշնակահարուհի, Չայկովսկու անվան մրցույթի դափնեկիր Նորին Պոլերան:

Ծրագրում՝ ֆրանսիացի կոմպոզիտորների ստեղծագործություններ են, Pphk.org-ին հղումով գրում է Panorama.am-ը:

Հախնազարյանն ավելի վաղ՝ մայիսի 6-ին և 7-ին, ելույթ էր ունեցել Սիդնեյի օպերային թատրոնում Սիդնեյի սիմֆոնիկ նվագախմբի հետ:

Washington Post-ի բնորոշմամբ Նարեկ Հախնազարյանը «Ֆենոմենալ թավջութակահար է, որը ներխուժել է միջազգային ասպարեզ՝ նվաճելով 2011 թվականի Չայկվսկու անվան մրցույթի 1-ին մրցանակը և Ոսկե Մեդալը»:

Միջազգային մրցույթների դափնեկիր Նարեկ Հախնազարյանը ծնվել է 1988-ին Երևանում՝ Հայտնի դաշնակահարուհի Գայանե Հախնազարյանի և ոչ պակաս հայտնի ջութակահար Սուրեն Հախնազարյանի ընտանիքում։ 1996-2000-ին սովորել է Սայաթ-Նովայի անվան դպրոցում։ 2000-ին ընդունվել է Մոսկվայի կոնսերվատորիային կից ակադեմիական երաժշտական դպրոց (պրոֆ. Ա. Սելեզնյովի դասարան), 2006- ին ավարտել այն և ընդունվել Մոսկվայի կոնսերվատորիա։ Նարեկը Չայկովսկու անվան մրցույթի դափնեկիր է, աշխատել է 50-ից ավելի նվագախմբերի հետ` այդ թվում` Լոնդոնի ու Չիկագոյի սիմֆոնիկների, Ռոտերդամի, Սեուլի ու Լա Սկալայի ֆիլհարմոնիկների: Աշխատել է բազմաթիվ հանրահայտ դերիժորների հետ` Գերգիև, Սպիվակով, Սոխիև և այլն: