FT. Հայոց ցեղասպանության ճանաչումը Բունդեսթագի կողմից կզայրացնի Թուրքիայի նախագահին

16 մայիսի 2016 - 14:43 AMT

PanARMENIAN.Net - Գերմանիայի խորհրդարանը շարունակում է քայլերն՝ ուղղված օրինագծի ընդունմանը, որը դատապարտում է Հայոց ցեղասպանությունը` քայլ, որը, հավանաբար, կզայրացնի Թուրքիայի նախագահ Ռեջեփ Թայիփ Էրդողանին և կսպառնա փախստականների վերաբերյալ ԵՄ-Թուրքիա փխրուն գործարքին, գրում է Tert.am-ը The Financial Times-ի վրա հղումով:

Հունիսի 2-ին նախատեսված քվեարկությունը տեղի կունենա էրդողանի հասցեին ուղղված գերմանացի երգիծաբանի վիրավորական բանաստեղծության շուրջ ստեղծված դիվանագիտական սկանդալի և փախստականների վերաբերյալ գործարքում կենտրոնական բաղադրիչ հանդիսացող Շենգենյան գոտում թուրքերի համար առանց վիզայի ճանապարհորդելու իրավունքի վերաբերյալ ԵՄ-ում աճող մտահոգությունների ֆոնին:

Այս քայլը կարող է է՛լ ավելի բարդացնել Գերմանիայի կանցլեր Անգելա Մերկելի ինտենսիվ ջանքերը` հանգստացնել Էրդողանին և համոզել նրան դադարեցնել փախստականների վերաբերյալ ձեռք բերված համաձայնագիրը տապալելու սպառնալիքները: Մերկելը կարող է ևս մեկ անգամ հանդիպել Թուրքիայի նախագահին. նա պետք է այցելի Ստամբուլ՝ ՄԱԿ-ի համաժողովին մասնակցելու համար:

Բունդեսթագը սկսել է քննարկել Հայոց ցեղասպանության վերաբերյալ օրինագիծը դեռ անցած տարի Ցեղասպանության 100-ամյա տարելիցից առաջ, բայց անգամ 2015 թվականի ապրիլին խորհրդարանական թեժ բանավեճից հետո Մերկելի կառավարությունը դիմադրեց քվեարկություն անցկացնելու ընդդիմադիր Կանաչների կուսակցության ջանքերին: Անգամ փախստականների ճգնաժամից առաջ Մերկելը մտահոգված էր թուրք-գերմանական հարաբերություններին սպառնացող պոտենցիալ վտանգի պատճառով:

Այնուամենայնիվ, կառավարությունն որոշել է, որ այլևս չի կարող շարունակել իշխող կոալիցիայի տանող գիծը և անտեսել Ցեղասպանության դատապարտման վերաբերյալ հնչեցվող հայտարարությունները, այդ թվում՝ Հռոմի պապի կողմից:

Կանաչների կուսակցության հետ բանակցություններից հետո Քրիստոնեա-դեմոկրատական միություն- Քրիստոնեա-սոցիալական միության՝ CDU/CSU-ի և Սոցիալ- դեմոկրատական կուսակցության՝ SPD-ի ղեկավարները համաձայնել են պաշտպանել Ցեղասպանության մասին որոշումը: Սա նշանակում է, որ այն գրեթե անկասկած կընդունվի, գրում է թերթը:

2015-ին Գերմանիայի խորհրդարանն ապրիլի 24-ին հավանություն տվեց Հայոց ցեղասպանության վերաբերյալ բանաձևին՝ Օսմանյան Թուրքիայում իրականացված 1,5 մլն հայերի զանգվածային սպանությունը որակելով ցեղասպանություն:

Գերմանիայի մայրաքաղաք Բեռլինի Մայր տաճարում Հայոց ցեղասապանության զոհերի հիշատակին նվիրված արարողության ժամանակ Գերմանիայի նախագահ Յոախիմ Գաուկը Օսմայան կայսրության իրագործած 1915-ի հայկական ջարդերը կոչել է ցեղասապանություն: Այդպիսով, նա դարձել է այդ երկրի առաջին ղեկավարը, որն արտասանել է «Հայոց ցեղասպանություն»:

Չնայած տեքստը դեռ չի հրապարակվել, օրակարգը ներկայացնող տեքստն արդեն պարզ է դարձնում մտադրությունները. «101 տարի առաջ Օսմանյան կայսրությունում հայերի և այլ քրիստոնյա փոքրամասնությունների ցեղասպանության հիշատակին»:

Քվեարկության հետաձգումը նշանակում է, որ այն տեղի է ունենում անգամ շատ ավելի անհարմար ժամանակ, քան մեկ տարի առաջ էր: Այնուամենայնիվ, Կանաչների կուսակցության՝ թուրքական ծագմամբ ղեկավարներից Չեմ Օզդեմիրը Bild Am Sonntag թերթին ասել է. «Շատ հնարավոր է, որ Անկարայում զայրույթի ալիք կլինի: Բայց Բունդեսթագը թույլ չի տալիս իրեն շանտաժի ենթարկել Էրդողանի նման բռնակալի կողմից»:

Գերմանացի մտավորականները, այդ թվում` թուրքական ծագում ունեցող ռեժիսոր Ֆաթիհ Ակինը, բաց նամակով դիմել են Գերմանիայի կանցլեր Անգելա Մերկելին և Բունդեսթագին` կոչ անելով Մերկելին ճանաչել Հայոց ցեղասպանությունը հունիսի 2-ին ընդունվելիք բանաձևով: Բաց նամակը հրապարակվել է Die Zeit գերմանական պարբերականում: Նամակում գերմանացի մտավորականները կոչ են անում «հստակ դիրքորոշում ցույց տալ հունիսի 2-ին և հայ ժողովրդի դեմ իրականացված հանցագործությունը կոչել իր անունով` ցեղասպանություն»:

Ընթերցեք նաև. Ճանաչել Հայոց ցեղասպանությունը. Գերմանացի մտավորականների, այդ թվում՝ Ֆաթիհ Ակինի կոչը Մերկելին

Հղումներ թեմայով.

FT. Bundestag motion on Armenia ‘genocide’ set to infuriate Erdogan

Tert.am. Հայոց ցեղասպանության վերաբերյալ Բունդեսթագի քայլերը կհարուցեն Էրդողանի զայրույթը. The Financial Times