Մխիթարյան. Կենտրոնացած եմ հավաքականի խաղերի վրա, ԱԱ եզրափակիչ դուրս գալը բարդ խնդիր է

PanARMENIAN.Net - Մայիսի 25-ին Հայաստանի ազգային հավաքականի գլխավոր մարզիչ Վարուժան Սուքիասյանը և թիմի ավագ Հենրիխ Մխիթարյանը Լոս-Անջելեսում հանդիպել են լրագրողների հետ։

Մայիսի 25-ին Հայաստանի հավաքականը և ՀՖՖ ֆուտբոլային պատվիրակությունը ժամանել են Լոս-Անջելես, որտեղ մայիսի 28-ին և հունիսի 1-ին Հայաստանի հավաքականը կանցկացնի ընկերական 2 հանդիպում՝ մրցելով համապատասխանաբար Գվատեմալայի և Էլ-Սալվադորի հավաքականների հետ։

Անդրադառնալով Գվատեմալայի հավաքականին, Մխիթարյանը նշել է, որ դեռ չեն ուսումնասիրել մրցակիցներին:

«Բայց գիտենք, որ բավականին ուժեղ թիմերի դեմ ենք խաղալու։ Մեզ համար լավ փորձ կլինի խաղալ լատինամերիկյան թիմերի դեմ։ Սա կարևոր է մեզ համար, որովհետև, հնարավոր է, շատ փորձարկումներ լինեն։ Այդ պատճառով կփորձենք լավագույն կերպով ներկայանալ հանդիպումներին», - հավելել է նա։

Հարցին, ինչպե՞ս կգնահատեք Հայաստանի հավաքականի՝ Աշխարհի առաջնության եզրափակիչ դուրս գալու հնարավորությունները, Մխիթարյանը պատասխանել է, որ խնդիրը բարդ կլինի լուծել:

«Այնպիսի խմբում ենք հանդիպել, որ բարդ կլինի լուծել այդ խնդիրը։ Սակայն կարծում եմ՝ պետք է փորձենք առաջ շարժվել քայլ առ քայլ։ Պետք է հաշվի առնել, որ ունենք այնպիսի հավաքական, որը դեռ նոր է կազմավորվում», - ասել է ֆուտբոլիստը։

Հարցին, թե ի՞նչ նորություններ կան նրա՝ այլ թիմ տեղափոխվելու կապակցությամբ, Մխիթարյանն ասել է.

«Ես ամբողջությամբ կենտրոնացած եմ Հայաստանի հավաքականի խաղերի վրա, որից հետո միայն կմտածեմ ակումբային գործերիս մասին»։

Հարցին, թե Եվրոպական հավաքականներից ու ՞մ շանսերն է ավելի բարձր գնահատում Եվրո-2016-ի ժամանակ, կիսապաշտպանը պատասխանել է. «Եթե ընտրելու լինեմ բոլոր հավաքականներից, կպատասխանեմ՝ Գերմանիա, Անգլիա և Ֆրանսիա»։

«Բորուսիան» մտադիր է պահել Մխիթարյանին մինչև 2017 թվականը. Արդեն 2 կարևոր խաղացող է վաճառել