Սևանա լճի մակարդակը բարձրացել է 25 սմ-ով

26 հուլիսի 2016 - 15:51 AMT

PanARMENIAN.Net - Սևանա լճի մակարդակը 2016-ի հուլիսի 26-ի դրությամբ 25 սմ-ով բարձր է 2015-ի նույն օրվա ցուցանիշից:

ՀՀ Արատակարգ իրավիճակների նախարարության պաշտոնական կայքի համաձայն, լճի մակարդակը 2016-ի հուլիսի 26-ի դրությամբ եղել է 1900.73մ, իսկ 2015-ին՝ նույն օրը, այն 1900.48 մ էր:

2016-ի ամենաբարձր ցուցանիշը եղել է հունիսի 30-ին և հուլիսի 1-ին, երբ լճի մակարդակը բարձրանալով հասավ 1900.77 մ-ի, այնուհետև մեկ սանտիմետրով իջավ և մինչև հուլիսի 15-ը պահպանեց 1900.76մ մակարդակը, ապա աստիճանաբար սկսեց նվազել, գրում է Ecolur.org-ը:

2016 թվականի մայիսի 23-ի դրությամբ Սևանա լճի մակարդակը ծովի մակերևույթից գտնվել է 1900 մ 61 սմ բարձրության վրա, ինչը 14 սմ-ով բարձր է նախորդ տարվա նույն օրվա նիշից: Գեղարքունիքի մարզպետարանի աշխատակազմի գյուղատնտեսության և բնապահպանության վարչության տվյալներով, Սևանի մակարդակը հետզհետե մոտենում է 1962 թվականի նիշին, երբ այն գտնվել է ծովի մակերևույթից 1900 մ 80 սմ բարձրության վրա:

Այժմ Արփա-Սևան թունելային ջրատարով օրական 1.115 մլն խորանարդ մետր ջուր է տեղափոխվում, լիճ թափվող գետերը ևս ավելացրել են իրենց ելքերը, դրանց էլ գումարվում են առատ տեղումները: Արփա-Սևան թունելային ջրատարով ընփացիկ տարում տեղափոխվել է 58 մլն խորանարդ մետր ջուր: Եվս 11 միլիոն խորանարդ մետր ջուր մուտք է եղել ստորերկրյա հոսքի շնորհիվ:

1961 թվականին լիճը գտնվել է ծովի մակերևույթից գտնվել է 1902 մետր բարձրության վրա, հաջորդ տարում՝ իջել ավելի քան 1.2 մետրով: Լճի մակարդակի անկումը շարունակվել է դրան հաջորդած բոլոր տարիների ընթացքում՝ մինչև 1980-ական թվականներին Արփա-Սևան թունելային ջրատարի շահագործումը:

Սևանի մակարդակի հերթական անկման փուլը սկսվել է 1990-ական թվականներից՝ Հայաստանի տնտեսական շրջափակման եւ էներգետիկ ճգնաժամի տարիներին եւ շարունակվել մինչև 2003 թվականը: 2003-2016 թթ ընթացքում լճի մակարդակը շարունակաբար բարձրացել է ավելի քան 3,5 մետրով:

Հղումներ թեմայով.

Սևանա լճի մակարդակը 25 սմ-ով բարձր է նախորդ տարվա նույն օրվա ցուցանիշից. Ecolur.org