Փաշինյան. «Սասնա ծռերն», այնուամենայնիվ, քննարկում էին Սարգսյանի հրաժարականն օրակարգից հանող տարբերակը

Փաշինյան. «Սասնա ծռերն», այնուամենայնիվ, քննարկում էին Սարգսյանի հրաժարականն օրակարգից հանող տարբերակը

PanARMENIAN.Net - Ազգային ժողովի պատգամավոր Նիկոլ Փաշինյանն անդրադառձել է «Նոր Հայաստան» շարժման առաջնորդ Ժիրայր Սեֆիլյանի՝ հուլիսի 6-ին հրապարակած նամակին՝ ֆեյբուքյան իր էջում գրելով հետևյալը:

«Հիմնադիր խորհրդարանի» անդամ Ժիրայր Սեֆիլյանը «Վարդաշեն» ՔԿՀ-ից հանդես է եկել նամակով, որտեղ անդրադառնում է նախագահ Սերժ Սարգսյանի հրաժարականի պահանջին և պայքարի հետագա ընթացքին: Նամակում, մասնավորապես, ասվում է. «Այն ապատեղեկատվությունը, որ օրեր առաջ շրջանառության մեջ դրվեց Վիտալի Բալասանյանի կողմից, թե իբր Սասնա Ծռերի տղաները եւ ես հրաժարվել ենք Սերժ Սարգսյանի հրաժարականը պահանջելուց, նույն պահին իսկ հերքվեց Սասնա Ծռեր խմբի ներկայացուցիչների կողմից եւ երկու օր անց՝ իմ կողմից: Ցավալիորեն այդ ապատեղեկատվությունը շարունակվում է շրջանառվել, այս անգամ սակայն, ընդդիմադիր գործիչ, հարգելի Նիկոլ Փաշինյանի կողմից: Վերջինս մատնացույց է անում հուլիսի 31-ին իմ տարածած հայտնի նամակը՝ ասելով, «որ այնտեղ ես Սերժ Սարգսյանի հրաժարականի պահանջ չեմ բարձրացրել»: Դժբախտաբար, Նիկոլ Փաշինյանը տարընթերցմամբ է ընկալել այդ նամակի բովանդակությունը, մասնավորապես չնկատելով նախաբանում գրված պարբերությունը, որտեղ սեւով սպիտակի վրա նշված է, որ այս նամակի բովանդակությունը բացառապես վերաբերում է հավանական բանակցությունների առաջարկությանը որպես ոսկե միջին, որի արդյունքում տղաները պետք է զենքը վայր դնեին: Շեշտում եմ, բացառապես վերաբերում էր տղաների կողմից զենքը վայր դնելուն ու արյունահեղությունը կանխելուն»:

«Քաղբանտարկյալ Ժիրայր Սեֆիլյանի օգոստոսի 6-ի նամակից հետո հարկ եմ համարում ընդգծել.

1. Հուլիսի 22-ին Խորենացի փողոցում ունեցած ելույթում առաջ քաշեցի հետևյալ տրամաբանությունը. ՊՊԾ գնդի շուրջ ստեղծված իրավիճակի հանգուցալուծման երկու պատկերացում կա առաջադրված. «Սասնա ծռերն» ասում են, որ Սերժ Սարգսյանը պետք է հրաժարական տա, Սերժ Սարգսյանն ասում է, որ «Սասնա ծռերը» պետք է վայր դնեն զենքերը:

2. Քանի որ ճգնաժամը Հայաստանի համար լրջագույն վտանգներ էր պարունակում, առաջարկեցինք, որ ՀՀ յուրաքանչյուր քաղաքացի դիրքորոշում արտահայտի «Սասնա ծռերի» և Սերժ Սարգսյանի առաջ քաշած տարբերակների կապակցությամբ:

3. «Քաղաքացիական պայմանագիր» կուսակցությունը ընտրեց «Սասնա ծռերի» առաջ քաշած տարբերակը: Ասացինք նաև, որ մեզ պատասխանատու ենք համարում, որ Սերժ Սարգսյանի հրաժարականի կողմնակից քաղաքացիները հրապարակում իրենց կամքը անարգել արտահայտելու հնարավորություն ունենան՝ Երևանում և մարզերում: Սրա համար հարկավոր է, որ հավաքներն անցնեն առանց պրովոկացիաների, բախումների, որպեսզի հրապարակ գալու հետ կապված մարդկանց հնարավոր մտավախությունները հասնեն նվազագույնի:

4. Այս քաղաքական օրակարգը և անելիքը ձևակերպելու հաջորդ օրը պարզվեց, որ Ժիրայր Սեֆիլյանը և «Սասնա ծռերը» Սերժ Սարգսյանի հետ քննարկում են ՊՊԾ գնդի շուրջ ստեղծված իրավիճակի հանգուցալուծման այնպիսի տարբերակ, որը չի ներառում Սերժ Սարգսյանի հրաժարականը, բայց ներառում է «Սասնա ծռեր» խմբի հանձնվելը իշխանություններին, այսինքն՝ զենքերը վայր դնելը:

Այս պնդման հիմնավորումների համար՝

- (տես՝ Վարուժան Ավելիսյանի հուլիսի 24-ի ասուլիսը(10 րոպե 40 վայրկյանից),որտեղ նա խոսում է խորհրդապահական կարգով քննարկվող մի տարբերակի մասին, համաձայն որի Սերժ Սարգսյանը ոչ թե հրաժարական է տալիս, այլ նրա լիազորությունները կրճատվում են.

- (տես՝ Ալեք Ենիգոմշյանի հուլիսի 25-ի հարցազրույցը Lragir.am-ի հետ (45-րդ վայրկյանից) , որտեղ նա ասում է, որ Վիտալի Բալասանյանի խոսքը խեղաթյուրում է իրականությունը և Ժիրայր Սեֆիլյանը ուղղակիորեն չի ասել, որ ինքը այսուհետև չի պահանջում Սերժ Սարգսյանի հրաժարականը. հղումը կարևր է, քանի որ Ենիգոմշյանը ընդունում է, որ Ժիրայր Սեֆիլյանը առնվազն անուղղակիորեն նման բան ասել է):

- (տես Ժիրայր Սեֆիլյանի հուլիսի 31-ի և օգոստոսի 6-ի նամակները, որոնցից ակնհայտ է դառնում, որ Ժիրայր Սեֆիլյանը բանակցել է «Սասնա Ծռերի» կողմից զենքերը վայր դնելու վերաբերյալ՝ առանց Սերժ Սարգսյանի հրաժարականի. այսինքն՝ Սերժ Սարգսյանը հրաժարական չի տալիս, բայց «Սասնա ծռերը» վայր են դնում զենքերը:

5. Այսպիսով՝ Ժիրայր Սեֆիլյանը և «Սասնա ծռերը» հրաժարվեցին ՊՊԾ գնդի շուրջ ստեղծված իրավիճակը Սերժ Սարգսյանի հրաժարականով հանգուցալուծելու իրենց բարձրացրած և մեր կողմից քաղաքականապես ձևակերպված տարբերակից և ընտրություն կատարեցին զենքերը վայր դնելու օգտին. (hիմա ակնհայտ է, որ եթե չլիներ «Սասնա ծռեր» խմբի մի քանի անդամների դիմադրությունը, զենքերը վայր էին դրվելու ավելի վաղ):

6. Նման պայմաններում ՊՊԾ գնդի շուրջ ստեղծված իրավիճակի հանգուցալուծման մեր առաջ քաշած սցենարն ու ճանապարհային քարտեզը դառնում էր անիրագործելի՝ Ժիրայր Սեֆիլյանի և «Սասնա ծռերի» քաղաքական ղեկավարների դիրքորոշումների փոփոխության պատճառով: Ի դեպ, ուզում եմ նշել, որ Ժիրայր Սեֆիլյանն ու իր ընկերները Սերժ Սարգսյանի հրաժարականի պահանջից հրաժարվել էին ոչ թե ընդհանրապես, որպես քաղաքական պահանջ, այլ հրաժարվել էին որպես ՊՊԾ գնդի շուրջ ստեղծված իրավիճակի հանգուցալուծման գործնական միջոց: Այսուհանդերձ այս մոտեցումը փոխեց քաղաքական իրավիճակը և անխուսափելի դարձրեց շարժման թուլացոմը:

7. Սերժ Սարգսյանի հրաժարականի պահանջը որպես ոչ առաջնային կետ հայտնվեց Գարեգին Չուգասզյանի և Ժիրայր Սեֆիլյանի նամակներում, բայց այն բանից հետո, երբ «Սասնա ծռեր» խմբի տղաները արդեն իսկ վայր էին դրել զենքերը, և գտնվում էին բանտում, այսինքն՝ ՊՊԾ գնդի շուրջ ստեղծված իրավիճակը ինչ-որ հանգուցալուծում էր ստացել և ուրեմն՝ Սերժ Սարգսյանի հրաժարական չէր կարող լինել ՊՊԾ գնդի տարածքից «Սասնա ծռեր» խմբի անդամների դուրս գալու, կամ զենքերը վայր դնելու նախապայման: Այսինքն, Սերժ Սարգսյանի հրաժարականի այս պահանջը իր քաղաքական իրագործելիությամբ ոչնչով չէր տարբերվում ասենք 2015 թվականի դեկտեմբերին, կամ 2015 թվականի ապրիլին առաջադրված պահանջներից:

8. Չեմ կարող կասկած հայտնել Ժիրայր Սեֆիլյանի և «Սասնա ծռեր» խմբի տղաների մղումների ազնիվ լինելու վրա, բայց վերը հիշատակված կետերում արվել են քաղաքական կոպիտ սխալներ, որոնք լրջագույն ազդեցություն են ունեցել քաղաքական իրավիճակի վրա: Հարկ է ընդգծել, որ հուլիսի 22-ից հետո հարթակից չի հնչել Սերժ Սարգսյանի հրաժարականին հասնելու որև ճանապարհային քարտեզ, ինչը բերել է ժողովրդական շարժման թուլացմանը և «Սասնա ծռերին» այլ ելք չի թողել, քան հանձնվել իշխանություններին:

Հ.Գ. Ազատություն բոլոր քաղբանտարկյալներին և քաղաքական հալածյալներին»:

 Ուշագրավ
Նա նշել է, որ այժմ միայն ինստիտուցիոնալ բարեփոխումներ և բովանդակային աշխատանք պետք է արվի
Նա նշել է, որ երկրների միջև ռազմատեխնիկական համագործակցությունը երկար ավանդույթ ունի
Նա չկար ՀՀ վերադարձած հայ գերիների թվում, թեև ավելի վաղ Ադրբեջանում հրապարակած ցուցակում նրա անունն ընդգրկված էր
Փաշինյանի հեռախոսազրույցը Ղազախստանի նախագահ Կասիմ-Ժոմարտ Տոկաևի հետ
---