Վանաձորում ՏԻՄ ընտրությունների հիմնական խախտումը քվեաթերթիկները նկարելն էր, իսկ հիմնական ահազանգերը վերաբերում էին ընտրակաշառքին: Այս մասին հայտնել են Վանաձորի ՏԻՄ ընտրությունների ընդդիմադիր թեկնածուների շտաբերի ներկայացուցիչները համատեղ ասուլիսի ժամանակ:

Tert.am-ը գրում է, որ Հայ ազգային կոնգրես կուսակցության ներկայացուցիչ Էդգար Ոսկանյանն ասել է, թե իրենց շտաբը ֆիքսել է բազմաթիվ ընտրախախտումներ, տեղամասերի դիմաց եղել են բազմաթիվ կուտակումներ, միջադեպեր են գրանցվել մի քանի տեղամասերում, որոնք ճշտվում են:

«Լուսավոր Հայաստան» կուսակցության ներկայացուցիչ Աստղիկ Ավետիքյանն էլ նշել է, որ իրենք ևս խախտումներ են արձանագրել: Ըստ նրա՝ վերջին մի քանի ժամվա ընթացքում ստացել են ահազանգ 30/17 տեղամասից, որտեղ, Ավետիքյանի խոսքով, ԲՀԿ ցուցակի երկրորդ համարը գլխավորող Հրանտ Մարգարյանը, որն այցելել է տեղամաս, դուրս է եկել հանձնաժողովի անդամներից մի քանիսի հետ, ապա, նրա գնալուց հետո նույն տեղամասում հայտնաբերվել է դատարկ քվեաթերթիկ:

30/15 տեղամասում, Ավետիքյանի խոսքով, գրանցվել է ռուսական անձնագրով քվեարկություն, ինչից հետո իրավաբանը բացատրել է հանձնաժողովին, որ դա օրենքի կոպիտ խախտում է, բայց նախագահը հրաժարվել է ընդունել պատճառաբանությունը:

«Նախագահն ասել է, որ դա թույլատրելի է, բայց, կարծես, ամեն դեպքում արձանագրություն կազմվել է»,- նշել է նա:

Հարցին՝ ստացե՞լ եք ահազանգեր ընտրակաշառք բաժանելու վերաբերյալ, Աստղիկ Ավետիքյանը դրական է պատասխանել: Ճշտմանը՝ ո՞ւմ կողմից է բաժանվել, ՀՀԿ-ի՞, նա պատասխանեց. «Ոչ, պատկերացրեք Դաշնակցության մասին, ԲՀԿ-ից են ասել: Քանի որ իրեղեն ապացույցներ չունենք՝ ձեռնպահ ենք մնում: Խոսակցություններ կան, զանգեր ստանում ենք»: Նա նաև ասել է, որ տեղամասերից մեկում թաց անձեռոցիկով մաքրվել է ընտրողի կնիքը:

Հոկտեմբերի 2-ին՝ 08։00-ից մեկնարկել են Տեղական ինքնակառավարման մարմինների ընտրությունները ՀՀ 377 համայնքում, մասնավորապես` Գյումրի և Վանաձոր քաղաքներում։ Գյումրիում իշխանության համար պայքարում է 11 կուսակցություն և դաշինք, Վանաձորում՝ 8: