«Ձեռնարկությունների ինկուբատորում» չարաշահումներ են հայտնաբերվել. Հարուցվել է քրգործ

PanARMENIAN.Net - ՀՀ գլխավոր դատախազության պետական շահերի պաշտպանության վարչության կողմից ՀՀ վերահսկիչ պալատի 2016թ. ընթացիկ հաշվետվության ուսումնասիրությամբ պարզվել է, որ «Ձեռնարկությունների ինկուբատոր» հիմնադրամի ծառայողների կողմից հիմնադրամի գույքի կառավարման, պետական միջոցների տնօրինման գործընթացներում թույլ են տրվել խախտումներ և չարաշահումներ, որոնք առաջացրել են ծանր հետևանքներ:

Նկատի ունենալով, որ արձանագրված խախտումներն առերևույթ պարունակում են հանցագործության հատկանիշներ՝ ՀՀ գլխավոր դատախազության պետական շահերի պաշտպանության վարչության դատախազի կողմից ՀՀ քրեական օրենսգրքի 214-րդ հոդվածի 2-րդ մասով հարուցվել է քրեական գործ, որի նախաքննությունը հանձնարարվել է ՀՀ քննչական կոմիտեին, հայտնում է Գլխավոր դատախազությունը:

«Ձեռնարկությունների ինկուբատորի» հիմնադիրը Հայաստանի Հանրապետությունն է, ի դեմս ՀՀ կառավարության:

ՔՕ 2014-րդ հոդվածը նախատեսում է պատասխանատվություն Առևտրային կամ այլ կազմակերպությունների ծառայողների կողմից ծանր հետևանքներ լիազորությունները չարաշահելու համար: Հոդվածի 2-րդ մասը նախատեսում է տուգանք՝ նվազագույն աշխատավարձի երեքհարյուրապատիկից հինգհարյուրապատիկի չափով, կամ կալանքով՝ երկուսից երեք ամիս ժամկետով, կամ ազատազրկմամբ՝ առավելագույնը չորս տարի ժամկետով: