ՊՆ-ում քննարկել են սահմանամերձ համայնքներում արտադրամասեր հիմնելու հեռանկարները

PanARMENIAN.Net - Պաշտպանության նախարարությունում քննարկել են սահմանամերձ համայնքներում արտադրամասեր հիմնելու հեռանկարները: Հարցը քննարկվել է մատակարար ընկերությունների ներկայացուցիչների հետ ՀՀ պաշտպանության նախարարության նյութատեխնիկական ապահովման դեպարտամենտի աշխատակիցների հերթական հանդիպման ժամանակ:

Հանդիպումը հրավիրվել էր ՀՀ ՊՆ մատակարարման գործընթացն առավել արդար ու թափանցիկ կերպով կազմակերպելու, մատակարարների առաջարկները նկատի առնելու և բարձրաձայնած խնդիրները լուծելու նպատակով։

ՊՆ ՆՏԱ դեպարտամենտի պետ Կարեն Կարապետյանը և զինված ուժերի թիկունքի վարչության պետ, գնդապետ Նորայր Յոլչյանը հանդիպման մասնակիցների հետ քննարկել են սահմանամերձ համայնքներում արտադրամասեր ու ընկերությունների դուստր ձեռնարկություններ հիմնելու հեռանկարները և այն արտոնությունները, որոնք կտրամադրվեն նման նախաձեռնությունների հեղինակներին:

Թեթև արդյունաբերության ոլորտի, այդ թվում նաև զինված ուժերին զինվորական համազգեստ մատակարարող ընկերությունների ղեկավարները մի շարք խնդիրների վերաբերյալ ներկայացնելով իրենց տեսակետները, պատրաստակամություն են հայտնել առաջիկայում ներկայացնել իրենց առաջարկներն ու մտահղացումները, հայտնում է ՊՆ մամուլի ծառայությունը:

Ընթերցեք նաև. Սահմանամերձ համայնքներն կապահովվեն քաղաքացիական պաշտպանության հենակետերով