«Ազատություն» ռադիոկայանը ՄԻԵԴ-ում դատի է տվել Ադրբեջանին

PanARMENIAN.Net - «Ազատ Եվրոպա/«Ազատություն» ռադիոկայանը դիմել է Մարդու իրավունքների եվրոպական դատարան՝ ՄԻԵԴ, վիճարկելով Ադրբեջանի կառավարության կողմից ներկայացված այն պնդումները, որոնք խոչընդոտում են լրատվամիջոցի գործունեությունն այդ երկրում, հայտնում է Panorama-ն ռադիոկայանի վրա հղումով:

«Մենք ի վիճակի չեղանք որևէ առաջընթացի հասնել այդ մեղադրանքներն Ադրբեջանի դատական համակարգի միջոցով մաքրելու հարցում: Մեղադրանքները հիմնազուրկ են, և քանի որ Ադրբեջանն ընդդատյա է ՄԻԵԴ-ին, մենք որոշեցինք մեր գործը բերել այստեղ»,- նշել է «Ազատ Եվրոպա/Ազատություն» ռադիոկայանի նախագահ Թոմաս Քենթը:

Վերջինս նաև հավելել է, որ Ադրբեջանի իշխանությունների կողմից ձեռնարկված, այսպես կոչված, հետաքննությունը մեկ նպատակ ունի՝ լռեցնել Բաքվի բյուրոյի ձայնն ու սպառնալից մթնոլորտ ստեղծել լրագրողների համար:

«Ազատություն» ռադիոկայանի Բաքվի բյուրոն խուզարկության է ենթարկվել 2014-ի դեկտեմբերին, որից հետո Ադրբեջանի իշխանությունները ձեռնամուխ եղան բյուրոյի փակմանը և հարկային պարտավորությունները չկատարելու մեղադրանքով գործի հարուցմանը: