Լարի Գագոսյանի խոսքերը՝ Forbes-ի աշխարհի ամենահարուստ 100 գործարարի մեջբերումների ցանկում

22 սեպտեմբերի 2017 - 16:01 AMT

PanARMENIAN.Net - Հայտնի ամերիկահայ, Gagosian Gallery պատկերասրահների ցանցի հիմնադիր Լարի Գագոսյանի արտահայտություններն ընդգրկվել են Forbes-ի աշխարհի ամենահարուստ 100 գործարարից մեջբերումների ցանկում: Նրա հետ նույն ցանկում են Ուորեն Բաֆեթը, Բիլլ Գեյթսը, Թեդ Թըրները և այլոք:

Մասնավորապես Forbes-ի էջերում ներկայացվել են միլիարդատեր Սի Նյուհաուսի հետ կապված Գագոսյանի հիշողությունները, գրում է Sputnik Արմենիան:

«Միլիարդատեր Սի Նյուհաուսը որոշել էր գնել Ռոյ Լիխտենշտեյնի «Ալլոհա» նկարը, որի արժեքը $1 մլն էր: Այն ժամանակ եզակի կտավներ այդպիսի գին ունեին: Ես առաջարկեցի նրան գնել և չեկով վճարել: Սին, որը միլիարդատեր էր, ասաց, որ 1 մլն-ի անդորրագիր չի դուրս գրի, այլ ամեն ամիս 100.000-ական դոլար կվճարի: Երբ ես հարցրեցի, թե ինչու է այդպես վարվում, նա պատասխանեց. «Չեմ ուզում, որ կարծեն, թե այդ գումարը հեշտ է վաստակել»: Ինձ համար դա կարևոր դաս եղավ: Իսկ այսօր «Ալլոհայի» գինը ավելի քան 100 մլն դոլար է»,-ասել է Գագոսյանը:

Լարի Գագոսյանը ծնվել է 1945-ին Լոս Անջելեսում, նրա պապն ու տատը Հայաստանից էին: Գագոսյանը սովորել է Կալիֆորնիայի համալսարանի անգլերեն և ամերիկյան գրականության բաժնում: Իր կարիերան Լարրին սկսել է Կալիֆորնիայի համալսարանի մոտ պաստառներ վաճառելուց, իսկ արդեն 1976-ին բացել է սեփական պատկերասրահը: 1979-ին նա տեղափոխվել է Նյու Յորք, ավելի ուշ ծանոթացել է հայտնի արտ-դիլլեր Լեո Կաստելլիի հետ, որից շատ բան է սովորել և որին իր ուսուցիչն է համարում:

Հղումներ թեմայով.

Armeniasputnik.am. Forbes цитирует "короля арт-рынка" Ларри Гагосяна

Forbes. GREATEST LIVING BUSINESS MINDS - ON KEEPING 'EM HONEST: LARRY GAGOSIAN