Կավանի. Պարտադիր չէ Նեյմարի հետ ընկերներ լինել

PanARMENIAN.Net - «ՊՍԺ» ֆուտբոլիստ Էդինսոն Կավանին կրկին անդրադարձել է Նեյմարի հետ միջադեպին, երբ ֆուտբոլիստները վիճել էին 11-մետրանոցի իրացման համար:

«11-մետրանոցի հետ կապված միջադեպն անցյալում է: Նման բաներ պատահում են ֆուտբոլում: Մենք պետք է միասին լուծում գտնենք և գործենք որպես թիմ»,-ասել է նա, հայտնում է footballua.tv-ին:

Նա հավելել է, որ հարկավոր է մրցունակ թիմ լինել, սակայն պարտադիր չէ լինել ընկերներ: «Պետք է պրոֆեսիոնալ լինել, և, ի վերջո, յուրաքանչյուրն իր կյանքն ունի: Ամենակարևորը հաղթելն է, այնպես որ, պետք է լավագույն լուծումը գտնել թիմի համար: Կարծում եմ, պատասխանատու անձը կգտնի լուծում: Երբ որ նա որոշում կայացնի, այդպես էլ կլինի: Չեմ կարծում, թե որոշումն արդեն կայացվել է»,-ասել է նա:

Ավելի վաղ լուրեր տարածվեցին, որ «ՊՍԺ»-ն կարող է վաճառել Էդինսոն Կավանիին՝ ակումբը մտադիր է հրավիրել «Արսենալի» հարձակվող Ալեքսիս Սանչեսին: Չիլիացու տրանսֆերը կարող է տեղի ունենալ արդեն ձմռանը:

«ՊՍԺ»-ի գլխավոր մարզիչն է Ունան Էմերին:

«Պարի Սեն Ժերմեն» ֆուտբոլային ակումբում սկանդալ էր ծագել՝ վիճել էին ակումբի 2 առաջատարներ բրազիլացի Նեյմարն ու ուրուգվայցի Էդինսոն Կավանին: Ֆուտբոլիստները վիճել են 11-մետրանոցի համար: «Լիոնի» հետ խաղում բրազիլացին մտադիր էր իրացնել 11-մետրանոցը, սակայն Կավանին, որը «ՊՍԺ»-ի հաստիքային 11-մետրանոց իրացնողն է, ինքն է իրացրել ու չի հասել հաջողության: Հանդերձարանում վեճ է առաջացել, որը ծեծկռտուքի չի վերաճել միայն թիմի ավագ Տիագո Սիլվեի շնորհիվ: Սեպտեմբերի 21-ին Էմերին հայտարարել է, որ ուրուգվայցի հարձակվողը կմնա թիմում որպես հաստիքային 11-մետրանոցներ իրացնող: Նեյմարը խնդրել էր վաճառել Կավանիին: