ԱՄՆ-ն շնորհավորում են հայ ժողովրդին ակտիվ ու մրցակցային ընտրություններ անցկացնելու կապակցությամբ

PanARMENIAN.Net - Հայաստանում նախագահական ընտրությունների անցկացման կապակցությամբ, ԱՄՆ պետքարտուղարության անունից պաշտոնական մամլո հայտարարությամբ է հանդես եկել փոխխոսնակ Թոմ Քեսին: Հայտարարության մեջ, մասնավորապես, ասված է. «Շնորհավորում ենք հայ ժողովրդին փետրվարի 19-ին կայացած ակտիվ ու մրցակցային ընտրությունների կապակցությամբ եւ նշում ԵԱՀԿ Ժողովրդավարական հաստատությունների ու մարդու իրավունքների գրասենյակի եւ Խորհրդարանական վեհաժողովի կողմից տրված նախնական գնահատականը, համաձայն որի ընտրությունները հիմնականում համապատասխանել են ԵԱՀԿ-ի եւ Եվրախորհրդի կողմից ընդունած ժողովրդավարական ընտրությունների չափանիշներին: Միաժամանակ պետք է նշել, որ միջազգային դիտորդներն արձանագրել են զգալի խնդիրներ` կապված ընտրական գործընթացների հետ: Այնուամենայնիվ, ընտրական մարմինները դրական են արձագանքել վերահաշվարկ կատարելու պահանջներին: Կոչ ենք անում Հայաստանի կառավարությանն ապահովել այս վերահաշվարկների թափանցիկությունը, ուսումնասիրել բոլոր ենթադրյալ անճշտություններն ու քայլեր ձեռնարկել` բարելավելու հետագա ընտրությունները: Նաեւ հորդորում ենք բոլոր քաղաքական ուժերին շարունակել պահպանել օրենքի գերակայությունը եւ գործել խաղաղ ու պատասխանատվությամբ` հանուն ժողովրդավարական Հայաստանի»,- ասվում է ԱՄՆ Պետդեպարտամենտի հայտարարության մեջ: