ԱՄՆ Հավայի նահանգի վարչական կենտրոնը մտադիր է բարեկամանալ Ստեփանակերտի հետ

PanARMENIAN.Net - Արցախի ԱԳՆ-ն ողջունել է ԱՄՆ Հավայի նահանգի վարչական կենտրոն Հոնոլուլուի քաղաքային խորհրդի անդամ Քիմբերլի Մարկոս Փայնի՝ Ստեփանակերտի հետ բարեկամական հարաբերություններ հաստատելու մտադրությունը: Այս մասին «Արցախպրես»-ի փոխանցմամբ, հայտնել է ԼՂՀ ԱԳՆ տեղեկատվության և հասարակայնության հետ կապերի վարչության պետ Արտակ Ներսիսյանը:

«Նմանատիպ հարաբերությունների հաստատումը կարևոր ներդրում կունենա Արցախի և ԱՄՆ Հավայի նահանգի միջև համագործակցության զարգացման և ընդլայնման գործում», - ասել է Արտակ Ներսիսյանը:

Նրա խոսքով՝ երկկողմ կապերի հաստատումը մնում է Արցախի արտաքին քաղաքական օրակարգի առաջնահերթություններից մեկը։ Երկրի իշխանությունները շարունակելու են ջանքերը՝ օտարերկրյա պետությունների հետ ապակենտրոնացված համագործակցության ընդլայնման և տարբեր ոլորտներում համատեղ գործնական ծրագրերի իրականացման ուղղությամբ։

Հոնոլուլուն ԱՄՆ Հավայի նահանգի վարչական կենտրոնն է և ամենախոշոր քաղաքը՝ ավելի քան 350.000 բնակչությամբ։ 2016-ի մարտի 29-ին Հավայի նահանգի Ներկայացուցիչների պալատը Արցախի հանրապետությունը ճանաչելու մասին բանաձև է ընդունել, իսկ ապրիլի 20-ին մեկ այլ բանաձև է ընդունվել Հոնոլուլու շրջանի և քաղաքի Խորհրդի կողմից, որը սատարում է Արցախի Հանրապետությանն ու նրա իշխանությունների շարունակական ջանքերը՝ երաշխավորելու Արցախի քաղաքացիների իրավունքները։