Ղարաբաղի խնդիրը պետք է կարգավորվի բացառապես խաղաղ ճանապարհով փոխզիջումների հիման վրա

PanARMENIAN.Net - «Ես միշտ կարծել եմ եւ այժմ էլ այդպես եմ մտածում, որ Լեռնային Ղարաբաղի խնդիրը պետք է կարգավորվի բացառապես խաղաղ ճանապարհով փոխզիջումների հիման վրա: Իսկ այդ փոխզիջումները պետք է խելամիտ լինեն»,-հայտարարել է Հայաստանի վարչապետ, ՀՀ նորընտիր նախագահ Սերժ Սարգսյանը «Ռոսիյսկայա գազետա» թերթին տված հարցազրույցում: «Ես ինքս ծնունդով Լեռնային Ղարաբաղից եմ` այնտեղ եմ ծնվել, մեծացել, գրավել ամենապատասխանատու պաշտոնները: Բնականաբար, ես հրաշալի գիտեմ այդ տարածաշրջանի խնդիրները: Ղարաբաղյան հակամարտության կարգավորման վերաբերյալ իր դիրքորոշումը հայտնի է արդեն շուրջ 15 տարի:



Ես հանդես եմ եկել այդ խնդրի իմ տեսլականով նաեւ նախընտրական արշավի ժամանակ: Եվ ընտրողների այն քվեները, որոնք ես ստացա, ցույց են տալիս, որ հայ հանրությունը հավանություն է տալիս հակամարտության կարգավորման վերաբերյալ իմ մոտեցումներին: Ես գտնում եմ, որքան էլ դա պարադոքսալ թվա, որ Ադրբեջանը պետք է ճանաչի Ղարաբաղի ժողովրդի ինքնորոշման իրավունքը, իսկ Հայաստանը պետք է ճանաչի Ադրբեջանի տարածքային ամբողջականության իրավունքը: Առաջին հայացքից դրանք անհամատեղելի բաներ են: Սակայն միայն առաջին հայացքից: Եվ հենց այդ հիման վրա, հասկանալով միմյանց խնդիրները, մենք կարող ենք խելամիտ փոխզիջում գտնել»,-նշել է նա:



Պատասխանելով այն հարցին, թե կարող է արդյոք մի շարք երկրների կողմից Կոսովոյի անկախության ճանաչումը նախադեպ հանդիսանալ Լեռնային Ղարաբաղի համար, Սերժ Սարգսյանը հայտարարել է. «Մենք Կոսովոն նախադեպ չենք համարում ղարաբաղյան հակամարտության կարգավորման համար: Ուստի մենք համոզված ենք` յուրաքանչյուր հակամարտություն իր արմատներն ունի, զարգացման իր դինամիկան եւ կարգավորման ուղիները: Սակայն ամեն անգամ, երբ աշխարհում որեւէ տեղ իրականացվում է ժողովրդի ինքնորոշման իրավունքը, մենք ողջունում ենք այդ փաստը»: