Բուլղարիայի նախագահը հարգել է Հայոց ցեղասպանության զոհերի հիշատակը

PanARMENIAN.Net - Պետական այցով Հայաստան ժամանած Բուլղարիայի նախագահ Ռումեն Ռադևն փետրվարի 12-ի առավոտյան այցելել է Հայոց ցեղասպանության զոհերի հիշատակին նվիրված Ծիծեռնակաբերդի հուշահամալիր:

Նա ծաղկեպսակ է դրել հուշարձանին, եղևնի տնկել, այցելել Հայոց ցեղասպանության ինստիտուտ թանգարան:

Ծիծեռնակաբերդում Բուլղարիայի նախագահին ուղեկցել են ԱԳ նախարար Էդվարդ Նալբանդյանը, պաշտոնատար այլ անձինք:

2015-ին Բուլղարիան դատապարտել է Օսմանյան կայսրությունում հայերի ցեղասպանությունը «զանգվածային սպանություններ» ձևակերպմամբ: Պատճառը թուրքական ծագումով բուլղարացիների մեծ քանակն է, որոնք միշտ դեմ են հանդես գալիս Հայոց ցեղասպանության ճանաչմանը:

1396-1878թթ. Բուլղարիան եղել է Օսմանյան կայսրության կազմում: 1876թ. Թուրքիան դաժանորեն ճնշեց ապրիլյան ապստամբությունը Բուլղարիայում: Սերբիան ու Չերնոգորիան պատերազմ հայտարարեցին Օսմանյան կայսրությանը: Ռուսաստանն աջակցեց սլավոնական ժողովրդներին և 1877թ. ապրիլի 24-ին պատերազմը սկսեց: Բուլղարիայում այդ պատերազմն անվանեցին Ազատագրական պատերազմ:

Ռուսաստանի և Օսմանյան կայսրության միջև 1878թ. մարտի 3-ին կնքված Սան Ստեֆանոյի խաղաղ պայմանագրով Բուլղարիան դարձավ անկախ պետություն: