Դավիթ Հարությունյանը խոստացել է քննարկել շարժական արագաչափերի ուղղությունները նշելու հարցը

PanARMENIAN.Net - Շարժական արագաչափեր կիրառում են բազմաթիվ երկրներում: Այդ մասին լրագրողների հետ հանդիպման ժամանակ ասել է ՀՀ արդարադատության նախարար Դավիթ Հարությունյանը: Նրա խոսքով, կարելի է կիրառել և շարժական, և ոչ շարժական արագաչափ, և երկու դեպքում էլ օրենք խախտել:

«Այն, որ մարդիկ փողոցում քայլում են, և խանութներում կան տեսանկարահանող սարքեր, մարդու իրավունքների խախտու՞մ է, թե ոչ»,- ասել է նա, հայտնում է Panorama.am-ը:

Արձագանքին, թե այդ դեպքում ցուցանակով տեղեկացնում են անցորդներին, Հարությունյանը հակադարձել է. «Իսկ եթե շարժական արագաչափի մասին տեղեկացնում են՝ այսօր լինելու է Երևան-Սևան, Երևան-Գորիս, Երևան-Արարատ ճանապարհահատվածի վրա, բավարարվա՞ծ կլինեն վարորդները»,- ասել է նա:

Հարությունյանը խոստացել է քննարկել հարցը, որ շարժական արագաչափերի հիմնական ուղղությունները նշվեն, սակայն ընդգծել է, որ դա չի խախտում մարդու իրավունքները:

Փետրվարի 8-ից Ճանապարհային ոստիկանությունը շարժական լուսանկարահանող արագաչափ սարք է կիրառում: Ոստիկանությունը որոշել է կիրառել սարքը, հաշվի առնելով, որ 2018-ին Հայաստանում տեղի ունեցած ծանր հետևանքներով ճանապարհատրանսպորտային պատահարների հիմնական պատճառներից մեկը արագության ռեժիմի խախտումներն են, պատահարների նախականխման ուղղությամբ իրականացվող միջոցառումների շրջանակներում։