Ոստիկանությանը ներկայացվել է բաժիններում անչափահասներին առանց հիմքերի պահելու անթույլատրելիության և նրանց անհապաղ ազատ արձակելու պահանջ: Այդ մասին ասվում է ՄԻՊ հայտարարության մեջ:
«Մարդու իրավունքների պաշտպանի ներկայացուցիչների կողմից շարունակվում է աշխատանքը ոստիկանության բաժիններ բերման ենթարկված անձանց իրավունքների պաշտպանության ուղղությամբ»,-ասվում է հայտարարության մեջ:
ՄԻՊ աշխատակազմի արագ արձագանքման խմբերն այս պահի դրությամբ այցելել են ոստիկանության Նոր Նորքի, Էրեբունու, Կենտրոնականի, Մաշտոցի և Շենգավիթի բաժիններ։ Հատուկ ուշադրություն է դարձվում բերման ենթարկելու հիմքերին:
Ավելի վաղ հայտնի դարձավ, որ ՀՀ մարդու իրավունքների պաշտպանի գրասենյակը խիստ անթույլատրելի է համարում Երևանի Թումանյան-Մաշտոց փողոցների խաչմերուկում factor.am կայքի գլխավոր խմբագիր Արևիկ Սահակյանի մասնագիտական գործունեության խոչընդոտումը: