ԱԺ ԵԼՔ խմբակցության պատգամավորներ Ալեն Սիմոնյանը և Հայկ Կոնջորյանը երաշխավորագիր կներկայացնեն Արամ Մանուկյանի խափանման միջոցը փոխելու համար: Այդ մասին ասվում է Ալեն Սիմոնյանի ֆեյսբուքյան հեռարձակման մեջ:
Հայկ Կոնջորյանը նշել է, որ Պավլիկ Մանուկյանի որդու՝ Արամ Մանուկյանի առողջական վիճակը ծանր է, ինչն ավելի հրատապ է դարձնում նրա խափանման միջոցը փոխելու հարցը:
«Նա պետք է ազատության մեջ սպասի իր վճռին և հնարավորություն ունենա կարգավորել իր առողջական խնդիրները»,- ասել է Կոնջորյանը:
Արամ Մանուկյանը հրազենային վնասվածք ունի ոտքերի հատվածում։ Նրան մեղադրանք է առաջադրվել Քրեական օրենսգրքի 219-րդ հոդվածի 3-րդ մասով, որը սահմանում է շենքեր, շինություններ, տրանսպորտի, հաղորդակցության կամ կապի միջոցներ զավթելը և 235-րդ հոդվածով` ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը: