Ժան Կլոդ Յունկերն՝ Ազնավուրի մասին. Եվրոպան կորցրեց իր ամենահիասքանչ ձայներից մեկը

PanARMENIAN.Net - Եվրահանձնաժողովի նախագահ Ժան Կլոդ Յունկերը կարծում է, որ լեգենդար շանսոնյե Շառլ Ազնավուրի վախճանով Եվրոպան կորցրեց իր ամենահիասքանչ ձայներից մեկը:

«Ես խորապես վշտացած եմ նրա վախճանի մասին լուրով: Շառլ Ազնավուրը ոգեշնչում էր մի ամբողջ սերնդի համար՝ մարմնավորելով Ֆրանսիայի հիանալի կերպարը: Տասնամյակներ շարունակ և մինչև վերջին շունչը այդ մեծ արտիստը, երգիչը, կոմպոզիտորն ու դերասանը հարստացրել է մեր կյանքն իր արվեստով: Այսօր Եվրոպան կորցրեց իր ամենահիասքանչ ձայներից մեկը», -ասել է նա, հայտնում է ՏԱՍՍ-ը:

Լեգենդար շանսոնյեն մահացել է հոկտեմբերի 1-ին 94 տարեկանում: Ազնավուրը, որը վերջերս էր վերադարձել Ճապոնիայում համերգային շրջագայությունից, մահացել է իր տանը՝ Ֆրանսիայի հարավ-արևելքում:

Շառլ Ազնավուրը (իսկական անունը՝ Շահնուր Վաղինակ Ազնավուրեան) ծնվել է 1924 մայիսի 22-ին Փարիզում` հայ գաղթականներ Միշա և Քնար Ազնավուրյանների ընտանիքում: Նա ֆրանսահայ նշանավոր երգիչ, երգահան, գրող, կինոդերասան և հասարակական գործիչ է։ 1988-ի սպիտակյան ավերիչ երկրաշարժից անմիջապես հետո հիմնադրել է «Ազնավուրը՝ Հայաստանին» բարեգործական հիմնադրամը։ 2009 թվականի մայիսից Շվեյցարիայում Հայաստանի դեսպանն է, Հայաստանի մշտական դեսպանն է ՅՈւՆԵՍԿՕ-ում:

Ազնավուրը մոտ 1000 երգի հեղինակ է (մի մասը՝ երգահան Ժորժ Կառվարենցի հեղինակցությամբ), այդ թվում՝ բազմաթիվ միջազգային հիթերի՝ «Մաման», «Բոհեմը», «Դեռ երեկ», «Երիտասարդություն», «Պետք է գիտնալ», «Նա», «Երկու կիթառ», «Ինչպես ասում են», «Հավերժական սեր», «Ավե Մարիա» և այլն։ Ցայսօր վաճառվել է Ազնավուրի մոտ 100 միլիոն ձայնապնակ։ Ամերիկյան «Թայմ» հանդեսի հարցման համաձայն Ազնավուրը ճանաչվել է «Դարի արվեստագետ»։ Արժանացել է Հայաստանի և Ֆրանսիայի բարձրագույն պետական պարգևներին, «Պատվո սեզարի» (1997)։