Աշոտյան. Եթե ես ու Նիկոլի սելֆիի ձողիկը առաջադրվենք նույն տարածքում, այն կհաղթի

PanARMENIAN.Net - ԱԺ հայտարարությունների ժամին «Հանրապետական» խմբակցության պատգամավոր Արմեն Աշոտյանը անդրադարձել է ՀՀ փոխվարչապետեր Արարատ Միրզոյանի և Տիգրան Ավինյանի՝ արտահերթ ընտրություններում ՀՀԿ-ի նվազ հնարավորությունների մասին հայտարարություններին:

«Նայում եմ այսօր փոխվարչապետների հարցազրույցները, մեկը մյուսից ընտիր: Մի փոխվարչապետն ասում է`մենք մրցակիցներ չունենք, մյուսն ասում է` ՀՀԿ-ն մեզ մրցակից չէ: Տղերք, նորից ասեմ` մի կրկնեք իմ ու Շարմազանովի սխալները: Կործանումը սկսվում է մեծամտությունից, գոռոզությունից: Մի արեք դա: Փառք Աստծո, մի նախարար գտնվեց բարեկիրթ` ԿԳ նախարարը, ասաց, որ բոլորն էլ իրենց մրցակից են: Ախր, եթե գլուխ եք գովում Նիկոլի (Փաշինյան-խմբ.) ստվերի տակ, հիշեք, որ եթե ձեր նախընտրական եռյակի առաջին տեղում լինի Նիկոլի ուսապարկը, երկրորդ տեղում լինի Նիկոլի դուխով կեպկեն, երրորդում Նիկոլի հազը, դուք միևնույն է 80% ձայն եք հավաքելու: Իսկ եթե ռեյտինգայինով այնտեղ, որտեղ ես եմ առաջադրվելու, առաջադրվի Նիկոլի սելֆիի ձողիկը, էլի առաջին տեղն եք գրավելու: Այս նիկոլամանիայի պտուղները քաղեք, բայց մի թմբկահարեք: Դուք ունեք գուցե լումա, բայց ոչ այնքան լումա, որ այդ քաղաքական ժառանգությունը կարողանաք վերագրել ձեզ», - ասել է նա:

Աշոտյանն անդրադարձել է Փաշինյանի՝ քաղաքական բանավեճի ավանդույթ ստեղծելու գրառմանը:

«Եթե ուզում եք քաղաքական բանավեճ՝ խնդրեմ: Կարծում եմ` դա է ճիշտը, այլապես մենք կունենանք ժողովրդավարություն, ազատություն, բազմակարծություն, ճնշող մեծամասնություն՝ խորհդարանում, որը որևէ քաղաքական պրոդուկտ, օրակարգ չի կարող մեր ժողովրդին ներկայացնել»,- եզրափակել է նա:

Դեկտեմբերի 9-ին կկայանան արտահերթ խորհրդարանական ընտրությունները: