Մի շշկռվիր, մտահոգվիր. Քարոզարշավ, օր 1-ին

Մի  շշկռվիր, մտահոգվիր.  Քարոզարշավ, օր 1-ին

PanARMENIAN.Net - Նոյեմբերի 26-ին մեկնարկեց խորհրդարանական արտահերթ ընտրությունների նախընտրական քարոզարշավը: Ընտրապայքարի մեջ մտած քաղաքական ուժերը քարոզարշավի առաջին օրը սկսեցին Հայաստանի տարբեր բնակավայրերում ընտրողների հետ հանդիպումներով, ասուլիսներով, խնդրահարույց հայտարարություններով, հեռակա քաղաքական բանավեճերով, մանդարիններ բաժանելով և քարոզարշավի ավանդական ու ոչ ավանդական այլ տեխնոլոգիաներով: PanARMENIAN.Net ն ամփոփել է քարոզարշավի առաջին օրը:

«Արցախյան ազատամարտից ավելի կարևոր Հեղափոխությունը»

«Իմ քայլը» դաշինքը՝ ՀՀ վարչապետի պաշտոնակատար Նիկոլ Փաշինյանի գլխավորությամբ, քարոզարշավը սկսեց Շիրակի մարզից: Թալինում քարոզարշավի ընթացքում դաշինքի մաս կազմող «Քաղաքացիական պայմանագիր» կուսակցության վարչության անդամ Սասուն Միքայելյանը հայտարարեց, որ «Հեղափոխությունն Արցախյան ազատամարտից ավելի կարևոր էր»:

«Մենք հաղթել ենք Արցախյան պատերազմում, ես չեմ վարանում, վախենում ասել` այս հաղթանակը, որ մեր հանրապետությունում կրեցիք դուք` հայ ժողովուրդը, ավելի կարևոր էր, քան Արցախյան ազատամարտը»,-ասաց նա:

«Չշշկռվեք»

Փաշինյանն Արթիկում դաշինքի նախընտրական քարոզարշավի ընթացքում անդրադարձավ «Սասնա ծռեր» կուսակցության այն հայտարարությանը, թե գալիք խորհրդարանը երկու տարվա կյանք է ունենալու:

«Դուք իրո՞ք որոշել եք, որ ձեզ իրավունք է տրված որոշել խորհրդարանի ու երբեմն նույնիսկ մարդկանց կյանքի չափե՞րը, ես ձեզ ասում եմ՝ հանկարծ չշշկռվեք, սա ձեզ համար Սերժ Սարգսյանի թուլամորթ ու թուլակամ իշխանությունը չէ», - ասաց Փաշինյանը ու հավելեց՝ իրենց ժպիտներն ու քաղաքավարությունը որևէ մեկը թող չհամարձակվի մեկնաբանել որպես թուլություն։

«Դռնեդուռ ընկնող» Աշոտյանն ասել է՝ ինչու պետք է «ՀՀ քաղաքացին մտահոգվի»

Նախկին իշխող «Հայաստանի հանրապետական կուսակցությունը» քարոզարշավը սկսեց ասուլիսով: Կուսակցության փոխնախագահ Արմեն Աշոտյանը, անդրադառանալով «Եթե մտահոգ ես, ընտրիր Հանրապետականին» կարգախոսին, ասել է, թե ինչու պետք է ՀՀ քաղաքացին մտահոգ լինի և իր ձայնը տա նախկին իշխող ուժին:

«ՀՀ քաղաքացին մտահոգ պետք է լինի երկրի անվտանգությամբ, Արցախի ապագայով, բանակի մարտունակությամբ, սահմանների ամրությամբ, նոր թանկացումներով, սոցիալական խնդիրներով, աշխատանքը կորցնելու վտանգով, ավանդական արժեքների այլասերմամբ: Մենք կարծում ենք՝ անորոշ ապագան այսօր յուրաքանչյուր բնակարանում բաբախող բաց նեռվ է», - ասաց Աշոտյանը:

Աշոտյանը բացատրեց նաև, թե ինչու են սև և սպիտակ գույներն ընտրել նախընտրական պաստառների ձևավորման համար: Ըստ նրա՝ ՀՀ-ին «7 ամիս է, ինչ պարտադրվել է սև և սպիտակ իրականություն»:

Ի դեպ, Աշոտյանը քարոզարշավի առաջին օրը դեռևս «դռնեդուռ չի ընկել»:

Աշոտյան-Փաշինյան հեռակա բանավեճը

Աշոտյանը, ասուլիսի ընթացքում անդրադառանալով «մտահոգ քաղաքացիների թվին», որն ըստ իրեն հասնում է հազարների, հայտարարեց, որ դեկտեմեբրի 9-ի երեկոյան Փաշինյանին մեծ անակնկալ է սպասվում: Ի պատասխան՝ Փաշինյանը Շիրակից ասաց, որ ՀՀԿ-ականների համար անակնկալ կլինի, երբ պարզվի, որ «նույնիսկ իրենց տնեցիները ձայն չեն տվել իրենց»:

Աշոտյանի պատասխանը չուշացավ: Նա պնդեց, որ Փաշինյանը դրանով փաստեց՝ ՀՀԿ-ն «միակ ընդդիմադիր ուժն է» և ողջունեց նրան՝ անվճար ՀՀԿ-ի PR-ով զբաղվելու համար:

Աշոտյանին «հորդուրում են շտաբ չբացել»

Աշոտյանն ասուլիսի ընթացքում հայտնեց, որ «մարդիկ սկսել են վախենալ կարծիք հայտնելուց»:

«Ես գիտեմ բազմաթիվ դեպքեր իմ ընտրատեղամասում, մարդիկ, ում հետ խոսում եմ, ասում են՝ Արմեն ջան, շտաբեր չբացես, չենք գալու, բայց ձայները տալու ենք ձեզ: Չենք գալու, որովհետև վախենում ենք աշխատանքը կորցնել, չենք ուզում մեր տուն մարդ այցելի ու հարցնի՝ ինչու ես գնացել Աշոտյանի շտաբ», - ասաց նա:

«Հայուհուն վայել կարգախոսը»

Հեղափոխությունից հետո ձևավորված «Քրիստոնեաժողովրդական վերածնունդ» կուսակցության կարգախոսն է՝ «Արարչագործական Հայաստան` հայուհուն վայել»:

«Մանդարին կերեք»

Նոր ձևավորված «Քաղաքացու որոշում» սոցիալ-դեմոկրատական կուսակցությունը ընտարարշավի առաջին օրը սկսեց Հանրապետության հրապարակի հարակից այգում՝ մանդարիններ բաժանելով: Ըստ նրանց, միրգը թարմություն է խորհրդանշում:

Սելֆի՝ դասից փախած աշակերտների հետ, գորգ՝ պեմզաշենցիներին

Նիկոլ Փաշինյանը Լանջիկում սելֆի արեց դասից փախած աշակերտներ հետ՝ «վարչական ռեսուրսի ևս մեկ սաստիկ չարաշահում» թույլ տալով:

Պարզվում է, Պեմզաշեն համայնքի միակ խնդիրը մարզումների համար նախատեսված գորգն չունենալն էր:

«Գորգի խնդի՞ր է, միայն գո՞րգ»,- հետաքրքրվեց Փաշինյանը համայնքի բնակիչներից և, դրական պատասխան ստանալով, խոստացավ հարցը լուծել:

«Մենքը»՝ Տավուշում, ՀՅԴ-ն՝ Արամ Մանուկյանի արձանի մոտ, «Լուսավոր Հայաստանը»՝ Նոր Նորքում

«Մենք» կուսակցությունների դաշինքը քարոզարշավը սկսեց Տավուշի մարզից: Երեկոյան «Հայ Յեղափոխական դաշնակցությունը» փուչիկներով, դրոշակներով Արամ Մանուկյանի արձանի մոտ անցկացրեց առաջին հավաքը: «Լուսավոր Հայաստանը» Նոր Նորքում էր, շրջեց բակից բակ:

Նոյեմբերի 26-ին մեկնարկել է դեկտեմբերի 9-ին կայանալիք արտահերթ խորհրդարանական ընտրությունների նախընտրական քարոզարշավը, որը կտևի 12 օր:

 Ուշագրավ
Նա նշել է, որ այժմ միայն ինստիտուցիոնալ բարեփոխումներ և բովանդակային աշխատանք պետք է արվի
Նա նշել է, որ երկրների միջև ռազմատեխնիկական համագործակցությունը երկար ավանդույթ ունի
Նա չկար ՀՀ վերադարձած հայ գերիների թվում, թեև ավելի վաղ Ադրբեջանում հրապարակած ցուցակում նրա անունն ընդգրկված էր
Փաշինյանի հեռախոսազրույցը Ղազախստանի նախագահ Կասիմ-Ժոմարտ Տոկաևի հետ
---