«Ասեղով տղան», «շառլատաններն» ու Արցախը. Քարոզարշավ, օր 10-րդ 5 դեկտեմբերի 2018 - 18:32 AMT PanARMENIAN.Net - Դեկտեմբերի 5-ին՝ արտահերթ ընտրությունների քարոզարշավի 10-րդ օրը, հագեցած էր բուռն նախընտրական իրադարձություններով, հայտարարություններով` մասնավորապես Արցախյան հիմնահարցի շուրջ: Նախընտրական քարոզարշավի այս օրն առանձնացավ նաև համացանցում հայտնված ՀՀ ԱԱԾ տնօրեն Արթուր Վանեցյանի և ՀՀ վարչապետի պաշտոնակատար Նիկոլ Փաշինյանի հեռախոսազրույցի գաղտնալսումով: PanARMENIAN.Net ն ամփոփում է քարոզարշավի 10-րդ օրը: Շահնազարյանը հայտարարում է, բայց հանցագործության մասին հաղորդում չի տալիս «Հայաստանի հանրապետական կուսակցության» համամասնական ցուցակի 3-րդ համար Դավիթ Շահնազարյանը հրավիրվեց ՀՀ ազգային անվտանգության ծառայություն՝ պատմելու, թե ինչ հիմքերով է ՀՀ վարչապետի պաշտոնակատար Նիկոլ Փաշինյանին մեղադրում Արցախի դեմ դավադրություն կազմակերպելու մեջ: Շահնազարյանն անմիջապես ասուլիս հրավիրեց և հայտարարեց, որ կատարվածը «քաղաքական հետապնդում է», իսկ ինքն էլ ԱԱԾ չի պատրաստվում գնալ: «Շառլատանների» մասին Նիկոլ Փաշինյանը, լրագրողների հետ զրույցում անդրադառնալով Դավիթ Շահնազարյանի՝ Արցախի դեմ դավադրության մեջ լինելու մեղադրանքներին ասաց, որ պետական դավաճանության մասին հայատարարողը և այդ հանցագործության մասին չհաղորդողը շառլատան է: «Ըստ էության, նա մեղադրել է մեզ ինչ-ինչ ուժերի հետ միասին ընդդեմ Արցախի և ընդդեմ Հայաստանի ու հայ ժողովրդի դավադրություն կազմակերպելու մեջ: Այս հայտարարություններից հետո ԱԱԾ-ն պետք է նյութեր նախապատրաստի, ու եթե պարզվի, որ Հեղափոխությունն այդպես է տեղի ունեցել, ապա դավադիրները պետք է հայտնաբերվեն ու պատասխանատվության ենթարկվեն: Սա պետական դավաճանության մասին հայտարարություն է: Եթե որևէ մեկը բարձրաձայնում է պետական դավաճանության մասին և չի գնում իրավապահներին հաղորդում տալու հանցագործության մասին, ուրեմն նա շառլատան է», - ասաց Փաշինյանը: Քոքոբելյանը՝ «հակահեղափոխության պարզունակության» մասին «Մենք» դաշինքի կազմում «Ազատ դեմոկրատներ» կուսակցության նախագահ Խաչատուր Քոքոբելյանն ասաց, որ «զարմացած է Դավիթ Շահնազարյանի շատ-շատ հայտարարություներից»: «Եթե որևէ մեկը մտածում է, որ Հայաստանում տեղի ունեցած փոփոխություններն Արցախի դեմ են, կարծում եմ՝ նա ընկալման խնդիր ունի, ով էլ որ լինի: Չի կարելի այդքան պարզունակ ձեւակերպումներով փորձել մեր քաղաքացիների այս պայքարը հակադրել եւ արհեստականորեն փորձել դա Արցախի դեմ հանդես բերել», - ասաց նա: «Ասեղով տղան» ՀՀԿ-ի 9-րդ համար Մենուա Հարությունյանը Կապանում՝ Սյունիքի ազատագրական պայքարի առաջնորդներից Դավիթ Բեկի արձանի մոտ, ասեղով փուչիկներ պայթեցրեց՝ համեմատելով իր այդ գործողությունը Նիկոլ Փաշինյանի «ստերը պայթեցնելու հետ»: «Ես ասեղով տղան եմ, ով ծակելու է Նիկոլի փչած ստի փուչիկները», - ասաց նա՝ ծակելով մի քանի փուչիկ, մյուսներն էլ օդ բաց թողնելով: Իր ֆեյսբուքյան էջում հրապարակած տեսանյութում նա անդրադարձավ նաև Դավիթ Բեկի արձանի մոտ իր ձիով նկարին, ասելով, որ նրանք, ովքեր տեսակետ են շրջանառում են, թե ինքը ծաղրել է Բեկին, «անբարոյական են»: 18 տարեկանների փոխարեն ռոբոտներ սահմանին «Օրինաց երկիր» կուսակցության նախագահ Արթուր Բաղդասարյանը ֆեյսբուքյան իր էջում տեսանյութ հրապարակեց, որում անդրադառնալով զինված ուժերի մարտունակության բարձրացման անհրաժեշտությանը, ասաց՝ առաջնագիծ պետք է գնան ոչ թե 18 տարեկան երիտասարդները, այլ ժամանակակից ռոբոտները: Ոստիկանություն հրավիրված ՀՀԿ-ակաները ՀՀԿ-ի ցուցակով պատգամավորի թեկնածու Արմեն Աշոտյանը ֆեյսբուքյան իր էջում առանց մանրամասնելու գրեց, որ ինքը և ցուցակի 2-րդ համար Արփինե Հովհաննիսյանը ոստիկանություն են կանչվել: Ավելի ուշ պարզվեց, որ Հովհաննիսյանը Կենտրոնի ոստիկանությունում էր, կանչվել ցուցմունք տալու, քանի որ դիմել էր իրավապահներին համացանցում իր հասցեին հնչող սպառնալիքների դեպքով: Աշոտյանը նույնպես կանչվել է ոստիկանություն իր՝ «ՀՀԿ-ականներին քաղաքական ճնշումների ենթարկելու» մասին հայտարարությունների առթիվ ցուցմունք տալու: «Սասնա ծռերի» պահանջը «Սասնա ծռեր» կուսակցությունը հայտարարություն տարածեց՝ նշելով, որ ժամանակն է հստակեցնելու բոլոր ուժերի դիրքորոշումն Արցախի հարցում: «Սասնա ծռերը» բոլոր կուսակցություններին և դաշինքներին կոչ արեց հստակ դիրքորոշում հայտնել ազատագրված 7 շրջանն Ադրբեջանին հանձնելու հարցի վերաբերյալ: «Ուշակովի տարօրինակ հայտարարությունը» Փաշինյանը, անդրադառնալով դեկտեմբերի 6-ին կայանալիք ՀԱՊԿ գագաթնաժողովի հետաձգմանը, ասաց, որ Հայաստանը ոչ մեկին ոչ մի խնդրանքով չի դիմել: «Մենք ասել ենք, որ մենք ունենք մեր թեկնածուն ՀԱՊԿ-ում և մենք հետևողական շարունակում ենք բանակցել մեր թեկնածուի շուրջ», - ասել է նա՝ հավելելով, որ ՌԴ նախագահի օգնական Յուրի Ուշակովի հայտարարությունը, թե ՀՀ-ն խնդրել է, որ ՀԱՊԿ գլխավոր քարտուղարի նշանակման հարցը հետաձգվի՝ տարօրինակ է: Գաղտնալսում. Մաս 2-րդ Համացանցում հայտնվեց ՀՀ ազգային անվտանգության պետ Արթուր Վանեցյանի և ՀՀ վարչապետի պաշտոնակատար Նիկոլ Փաշինյանի գաղտնալսված հեռախոսազրույցը: Նրանք քննարկում էին ՀԱՊԿ նախկին գլխավոր քարտուղար Յուրի Խաչատուրովի կալանավորման հարցը: Բանավեճ՝ առաջին համարների մասնակցությամբ Հանրային հեռուստաընկերության ուղիղ եթերում, լուրերի գլխավոր՝ ժամը 21:00-ի թողարկումից հետո, տեղի կունենա նախընտրական բանավեճ՝ ընտրություններին մասնակցող քաղաքական ուժերի առաջին դեմքերի մասնակցությամբ: Այն կմեկնարկի լուրերի գլխավոր՝ ժամը 21:00-ի թողարկումից հետո: Ուշագրավ Նա նաև ասել է, որ Հայաստանի և Վրաստանի միջև սահմանազատման աշխատանքները վերսկսելու պայմանավորվածություն կա
Նրա գնահատմամբ՝ մտահոգիչ է նաև հատվածական սահմազատում և սահմանագծում իրականացնելը Դեսպանը նաև հրապարակել է Politico-ի հոդվածը «Thales» ընկերության ֆրանսիական ռադարների մասին Այն ենթադրում է տարբեր տեսակի աջակցություններ պետություններին՝ տեխնիկական, ոչ մահաբեր զինատեսակների տրամադրում Ամենաընթերցվողը բաժնում | Կայծակը հարվածել է Աբու Դաբի-Երևան չվերթի օդանավին՝ ճաքել է պատուհաններից մեկը Օդանավում խուճապ է սկսվել, սակայն օդաչուների պրոֆեսիոնալիզմի շնորհիվ հաջողվել է անվնաս վայրէջք կատարել Fastex-ը, Ucraft-ը և Hoory-ն հովանավորել են Dօing Digital 2024 համաժողովը և հատուկ մրցանակների արժանացել Fastex web3 էկոհամակարգը ճանաչվել է լավագույնը բլոկչեյնի նորարարական կիրառման համատեքստում GRECO-ն ՀՀ-ին կոչ է արել ավելի ուժեղ վերահսկողություն սահմանել բարձրագույն գործադիր գործառույթների նկատմամբ Իշխանությունները GRECO-ին պետք է ներկայացնեն զեկույցում առկա 22 առաջարկությունների վերաբերյալ իրենց կատարողականը Սենատոր Փիթերս․ Ադրբեջանն էթնիկ զտում է իրականացրել Նա գլխավորում է Հայաստանի պաշտպանության ակտի՝ S.3000 բանաձևի միաձայն ընդունման նախաձեռնությունը |