Կաթողիկոսը բարեմաղթանքներ է հղել ժողովրդի վստահությանն արժանացած կուսակցություններին

PanARMENIAN.Net - Ամենայն հայոց կաթողիկոսն Գարեգին Բ ուղերձ է հղել ՀՀ Ազգային ժողովի ընտրությունների առիթով՝ նշելով, որ Ազգային ժողովի արտահերթ ընտրություններ կարևոր հանգրվան դարձան Հայաստանում վերջին ամիսներին ընթացող ներքաղաքական զարգացումների:

«Մեր օրհնությունն ենք բերում ժողովրդին, ինչպես և կուսակցություններին, որ ապագայի հանդեպ պատասխանատվության գիտակցումով մասնակցություն բերեցին խորհրդարանական ընտրություններին: Մեր շնորհավորանքներն ու բարեմաղթանքներն ենք հղում «Իմ քայլը» դաշինքին, «Բարգավաճ Հայաստան» և «Լուսավոր Հայաստան» կուսակցություններին, որոնք արժանացան ժողովրդի վստահությանը՝ պատասխանատվություն ստանձնելով երկրի ապագայի համար: Աղոթում ենք, որ Տերը հաջողություններ պարգևի նորընտիր խորհրդարանի աշխատանքներին՝ հանուն մեր Հայրենիքի առավել զորացման և բարօր ապագայի կերտման,-ասվում է հայտարարության մեջ:

Նշվում է նաև, որ Առաքելական Սուրբ Եկեղեցին, ինչպես միշտ, իր ջանքերն է բերելու ի խնդիր պետականության ամրապնդման, ազգային համերաշխության զորացման և ներքին ու արտաքին մարտահրավերների հաղթահարման:

Կենտրոնական ընտրական հանձնաժողովի նախնական արդյունքների համաձայն, ՀՀ ԱԺ է անցել 3 քաղաքական ուժ։Ժամը 07:30-ի դրությամբ մշակվել է քվեաթերթիկների 100%-ը, ինչի արդյունքում ձայների 70.43%-ով հաղթել է «Իմ քայլը» դաշինքը՝ Նիկոլ Փաշինյանի գլխավորությամբ։Երկրորդ տեղը և 8.27% հավաքել է «Բարգավաճ Հայաստան» կուսակցությունը, երրորդ` 6.37%-ով, «Լուսավոր Հայաստանը»։