Կենդանաբանական այգում բեզոարյան այծ է սատկել

PanARMENIAN.Net - Թունավորման հետևանքով զեբրի անկման, մյուս կենդանիների անկման հետ կապված դեպքերի, դեռևս իրավապահների կողմից չպարզված հանգամանքների ֆոնին, դեկտեմբերի 12-ի առավոտյան դժբախտ դեպք է տեղի ունեցել նաև բեզոարյան այծերից մեկի հետ: Վերջինս հայտնաբերվել է սատկած վիճակում: Այդ մասին հաղորդագրություն է տարածել Կենդանաբանական այգու տնօրինությունը:

Բեզոարյան այծի այս առանձնյակը դեկտեմբերի 10-ին հայտնվել էր իր ազատավանդակից և Կենդանաբանական այգու սահմաններից դուրս, սակայն այգու աշխատակիցների ջանքերով նորից վերադարձել է այնտեղ:

Կենդանին այդ ազատավանդակում բնակվում էր 2013-ից՝ ծնվելու օրվանից: Թե ինչն է դարձել պատճառ, որ կենդանին փախնի տարածքից, ինչպես նաև՝ կենդանու անկման պատճառը, հանգամանալից ուսումնասիրությունը կպարզի:

«Փաստ է սակայն, որ վերջին շրջանում այգու շուրջ ծավալված իրադարձությունները շարունակվում են, և անհնար է դրանցում չնկատել հետևողականություն և ցանկալիին հասնելու պայքար: Պատահական չենք համարում, որ հերթական միջադեպը տեղի ունեցավ Այգու տնօրենի վերջին հարցազրույցից հետո: Համոզված ենք, որ քանի դեռ իրավապահ մարմիններնամբողջ ուժով և ծավալով չեն զբաղվել վերջին շրջանում Կենդանաբանական այգում տեղի ունեցած իրադարձություններով և դրանց մեղավորները չեն պատժվել, այս իրավիճակը, ցավոք, շարունակական է լինելու»,-ասվում է Կենդանաբական այգու հայտարարության մեջ:

Նշվում է, որ այս դեպքը կրկին մատնացույց է անում Կենդանաբանական այգու տնօրինության բազմիցս բարձրացրած՝ այգու ամբողջական տարածքի ցանկապատման խնդրի ակտուալությունը:

Կենդանաբանականում այժմ կա 12 բեզոարյան այծ, որոնցից երեքը այգում ծնվել են 2018-ին:

Նոյեմբերի 6-ին զեբրին խնամողը գտել էր կենդանուն ոչ բնական դիրքով պառկած։ Տևական անշարժունակությունից դատելով՝ կասկածներ էին եղել, որ կոտրված է կենդանու հետին վերջույթներից մեկը։ Լաբորատոր հետազոտության տվյալներով, սակայն, կենդանու արյան և մեզի մեջ հայտնաբերվել է մեծ քանակությամբ մկնդեղի (արսեն) պարունակություն։

Ավելի ուշ Երևանի Կենդանաբանական այգում կոկորդիլոս է սատկել: