ՄԱԿ-ի ԳԱ նախագահը Վրաստանին ագրեսոր է անվանել եւ խիստ քննադատել ԱՄՆ-ին

PanARMENIAN.Net - Ներխուժելով Հարավային Օսիա` Վրաստանը ագրեսիայի ակտ է իրականացրել եւ խախտել ՄԱԿ-ի կանոնադրությունը: Այդ մասին ՄԱԿ-ի ղեկավար կայանում տեղի ունեցած մամլո ասուլիսի ժամանակ հայտնել է ՄԱԿ-ի Գլխավոր ասամբլեայի նախագահ Միգել դ'Էսկոտո Բրոկմանը: Նրա խոսքերով, անհրաժեշտ է իրադրությունը համալրված դիտարկել, հաշվի առնելով, թե ինչից է այն ծագել»,- ասել է ՄԱԿ-ի ԳԱ նախագահը` պատասխանելով ամերիկացի լրագրողի այն հարցին, թե արդյոք Ռուսաստանը խախտել է ՄԱԿ-ի կանոնադրությունը` ներխուժելով Վրաստանի տարածք:



Այդ միջոցին, ինչպես հաղորդում է France Presse-ը, Միգել դ'Էսկոտո Բրոկմանը, զրուցելով ՄԱԿ-ի Անվտանգության Խորհրդի մշտական անդամներից մեկի ներկայացուցչի հետ, թաքնված, բայց խիստ քննադատության ենթարկեց ԱՄՆ-ին: «Երեւում է` վետոյի իրավունքն այնքան խորը արմատներ է գցել նրա մեջ, որ այժմ նա կարծում է, թե կարող է անել այն, ինչ որ ցանկանա առանց որեւէ հետեւանքների»:



Ինչպես հաղորդում է ՄԱԿ-ի մամլո ծառայությունը, սեպտեմբերի 17-ին Վրաստան կժամանի փաստերի հաստատման ՄԱԿ-ի առաքելությունը: Այն կանցկացնի երկրի հումանիտար, ինչպես նաեւ մարդու իրավունքների հետ կապված իրադրության գնահատում, կորոշի նաեւ օգնության անհրաժեշտությունը բնակչության շրջանում:



ՄԱԿ-ի փաստերի հաստատման առաքելությունը սեպտմեբերի 17-ից 20-ը կայցելի Հարավային Օսիա եւ վերջերս տեղի ունեցած հակամարտության վնասները կրած այլ շրջաններ, այդ թվում` Գորի եւ Թբիլիսի: Առաքելության անդամները կայցելեն նաեւ Մոսկվա: Սպասվում է, որ այդ առաքելության ուղեւորության արդյունքները կօգտագործվեն Վրաստանի համար ՄԱԿ-ի` օգոստոսի 18-ին հրապարակված հումանիտար կոչի վերանայման համար: Այն ժամանակ ՄԱԿ-ը Հարավային Օսիայի շուրջ հակամարտության արդյունքում տուժած գրեթե 130 հազար մարդկանց օգնություն ցուցաբերելու համար դոնորներից 58,6 միլիոն դոլլար էր պահանջել: