Կոնգրեսական Փալոնը Թավշյա հեղափոխությանն աջակցող բանաձև է ներկայացրել

PanARMENIAN.Net - ԱՄՆ կոնգրեսական Ֆրանկ Փալոնը 2018 թվականին Հայաստանում խաղաղ քաղաքական իրադարձությունները ողջունող բանաձև է ներկայացրել: Այս մասին հայտնել է Ամերիկայի հայ դատի գրասենյակը:

Բանաձևում կոչ է արվում ԱՄՆ-ին աջակցություն ցույց տալ հայ ժողովրդին ձեռք բերած առաջընթացն ամրապնդելու գործում. առաջարկվում է խորացնել ԱՄՆ-Հայաստան կապերը երկկողմ այցելություններով, պաշտպանության ոլորտում խորհրդատվությունների միջոցով, ամրապնդել գործակցությունը միջազգային խաղաղապահական գործողություններում, աջակցել կուսակցությունների, քաղաքացիական հասարակության զարգացմանը և մամուլի ազատությանը:

«Թավշյա հեղափոխությունն իր վերջնակետին հասավ 2018-ի դեկտեմբերի 9-ին ԱԺ արտահերթ ընտրություններով, որոնք, համաձայն ԵԱՀԿ դիտորդական առաքելության, հիմնված են եղել մարդու հիմնարար ազատությունների վրա և վայելում էին հանրային լայն վստահություն»,- ասվում է բանաձևում:

Նշվում է, որ նախորդ տարում եղած նշանակալի իրադարձություններն ապացուցում են, որ հայ ժողովուրդը հավատարիմ է ժողովրդավարությանը:

«Դրանք ցույց են տալիս, թե ինչու է այդքան կարևոր ԱՄՆ-ի համար բարձրացնել մեր գործակցությունը Փաշինյանի կառավարության հետ: Հայաստանն ապրում է վճռորոշ ժամանակաշրջան, երբ ԱՄՆ-ի աջակցությունը կարող է օգնել խթանել ժողովրդավարությունը և քաղհասարակության ինստիտուտների աճը: Լիահույս եմ, որ այս բանաձևը սկիզբն է ԱՄՆ-ի և Հայաստանի միջև ռազմավարական գործընկերության՝ հիմնված ընդհանուր շահերի և արժեքների վրա»,- ասել է Փալոնը:

Նա նաև վսատահեցրել է, որ կշարունակի ջանքեր գործադրել ԱՄՆ-ի կողմից Հայոց ցեղասպանության ճանաչման ուղղությամբ:

Ավելի վաղ ԱՄՆ Կոնգրեսը հաստատել է Հայաստանին ժողովրդավարական բարեփոխումների համար հատկացվող օգնությունը $40 մլն-ով ավելացնելու՝ Կոնգրեսի հայկական հարցերով հանձնախմբի համանախագահ Ջեքի Սփիրի բանաձևը:

Կոնգրեսի Ներկայացուցիչների պալատը հաստատել է Արցախում ականազերծման ծրագրի և վերականգնման ծառայությունների համար $1.5 մլն-ի օգնություն տրամադրելու նախաձեռնությունը: