Վերմիշյան. 2020-ին աղետի գոտում բնակարանների հարցը մեկընդմիշտ կլուծվի

Վերմիշյան. 2020-ին աղետի գոտում բնակարանների հարցը մեկընդմիշտ կլուծվի

PanARMENIAN.Net - ՀՀ վարչապետի հանձնարարականով 2020-ին երկրաշարժից տուժած 457 ընտանիքի բնակարանով ապահովելու համար հատկացվելու է 3 միլիարդ դրամ ու այս հարցը մեկընդմիշտ լուծվելու է։ Այդ մասին հայտարարել է ՀՀ Քաղաքաշինության կոմիտեի նախագահ Վահագն Վերմիշյանը։

Նա նշել է, որ 1988-ի երկրաշարժից տուժած 5396 ընտանիք բնակարանային խնդիրները պետք է լուծվեին 2008-2020 թվականներին։ «2008-2017-ին 4839 շահառուի բնակարանային խնդիրը լուծվել է, ծախսվել է 65 միլիարդ դրամ։ 2018-ին բյուջեից հատկացվել է 460 միլիոն դրամ, բնակարանով ապահովվել է 44 ընտանիք։ 2019-ին բյուջեից 560 միլիոն դրամ է նախատեսված Շիրակի, Լոռու, Արագածոտնի մարզերի գյուղերի 60 ընտանիքի համար»,-ասել է Վերմիշյանը՝ ներկայացնելով տվյալները, հայտնում է Panorama.am-ը:

Ինչ վերաբերում է տնակներում բնակվողներին՝ նա նշել է, որ մոտ 13 կատեգորիայի են բաժանում տնակներում բնակվողներին, օրինակ՝ գյուղում ունեն սեփականություն, բայց եկել են Գյումրիում կամ Վանաձորում բնակվում են տնակներում։

Քաղաքաշինության կոմիտեն հունիսի 28-ի դրությամբ, Շիրակի, Լոռու, Արագածոտնի մարզերից հավաքագրել է 7219 ընտանիքի (մոտ 25 հազար անձի) ոչ հիմնական շինությունների վերաբերյալ տեղեկատվության. Շիրակում՝ 3530, Լոռում՝ 3531, Արագածատոնի՝ 158։

Հարցի լուծումը Վ. Վերմիշյանը տեսնում է սոցիալական բնակարաններ կառուցելով։ «Շատ զարգացած երկրներում կա այդ կատեգորիան։ Տարբեր երկրներում տարբեր տոկոսներ են կազմում։ Նորվեգիան բավականին լուրջ զարգացած երկիր է սոցիալական առումով, բնակչության մոտ 20 տոկոսը բնակվում է սոցիալական բնակարաններում․ դա մինիմալ սանիտարահիգիենիկ պայմանները ապահովող բնակարան է, որևէ ճոխություն չկա, բայց միևնույն ժամանակ ունի ամեն ինչ՝ սանհանգույց, լոգարան։ Պետությունը կառուցում է ու տալիս է մինիմալ վարձով։ Միևնույն ժամանակ այդտեղ բնակվողներն իրավունք չունեն որևէ նորարարություն անել տանը, փոխել պատերի գույնը։ Առաջարկում են կառավարությանը, որ այս ծրագիրն ընդունի, կառավարությունը որոշում կկայացնի, միգուցե այլ ճանապարհ ընտրվի։ Այս ամենն արվում է, որպեսզի բնակիչները չդառնան անօթևան»,- ասել է Վերմիշյանը։

Նա նշել է, որ սոցիալական բնակարանաշինությունը 20 տոկով ավելի էժան է, քան այն բնակարանները, որ ավանդաբար պատկերացնում են, միաժամանակ դրանք բավականին արժանապատիվ, արժանի շինություններ են։

 Ուշագրավ
Ցեղասպանությունների կանխարգելման միջազգային օրն է
«Մանկաբույժն էլ եկավ՝ Սերգեյ Գերասիմովիչը»,- կատակել է քաղաքապետը
Նշվում է, որ Հայաստանը հայտնի է որպես «աշխարհի հնագույն քրիստոնյա երկիր»