Արարատում վթարից տուժած 13-ամյա երեխան դուրս է գրվել հիվանդանոցից

10 հուլիսի 2019 - 17:46 AMT

PanARMENIAN.Net - Երևան-Երասխավան ավտոճանապարհին վթարի հետևանքով տուժած և «Սուրբ Աստվածամայր» ԲԿ տեղափոխված 13-ամյա երեխան արդեն առողջացած դուրս է գրվել հիվանդանոցից: Այդ մասին իր ֆեյսբուքյան էջում հայտնել է Երևանի «Սուրբ Աստվածամայր» ԲԿ-ի մամուլի խոսնակ Գևորգ Դերձյանը:

Նա նաև լուսանկար է հրապարակել, որտեղ երեխային ուղեկցում են նրան բուժող բժիշկները։

«Երեխան «Սուրբ Աստվածամայր» ԲԿ էր տեղափոխվել ձեռքի կոտրվածքով, ոտքերի հատվածում կտրած-ծակված վերքերով և ծնոտային քերծվածքներով: Երեխան վիրահատվել էր, վիրահատությունն անցել էր լավ»,-ասվում է գրառման մեջ:

Հուլիսի 6-ին Երևան-Երասխավան ճանապարհին Զոդի կամուրջին իրար բախվել են «Toyota», «ՎԱԶ-2106» և «ԳԱԶել» մակնիշների ավտոմեքենաները։ ՃՏՊ հետևանքով հրդեհ է բռնվել, զոհվել է 6 մարդ, 11-ը վիրավոր են ու տեղափոխվել են տարբեր բուժկենտրոններ։ Մի քանի մարդ այրվել է երթուղային տաքսիում, բռնկված հրդեհի հետևանքով։ Տուժածներից 3-ը երեխաներ են։Դեպքի վայրում եղած ականատեսները պատմել են լրագրողներին, որ ուժեղ կրակի պատճառով չեն կարողացել հանել մարդկանց մեքենայից։

Հղումներ թեմայով.

Գևորգ Դերձյանի ֆեյսբուքյան էջ