Անանյանը՝ «Ձյունիկի» և «Վեգայի» հրդեհների դիտավորության մասին. Ծիծաղելի վարկած է

PanARMENIAN.Net - Պետական եկամուտների կոմիտեի նախագահ Դավիթ Անանյանն, անդրադառնալով «Ձյունիկ սառնարան» և «Վեգա» ընկերություններում հրդեհների դիտավորության մասին շրջանառվող լուրերին, ասել է, որ դա ծիծաղելի վարկած էէ:

«Դա ծիծաղել է»,- լրագրողների հետ զրույցում ասել է նա, հայտնում է Panorama.am-ը:

Անդրադառնալով այն հարցին, թե արդյոք այդ ընկերությունները ռիսկային խմբում էին գտնվում՝ ՊԵԿ նախագահը նշել է, որ իրենք նման տեղեկատվություն չունեն։ «Ռիսկային գնահատված կազմակերպությունների ցանկը 900 է, որոնց անունները բառացի չեմ հիշում»,- նշել է Անանյանը:

Այն դիտարկմանը, թե հրդեհից հետո չի՞ ճշտել արդյոք, թե այդ ընկերությունները ռիսկային կազմակերպությունների ցանկում են, թե ոչ՝ ՊԵԿ նախագահն արձագանքել է.«Ես ասում եմ, որ դա ծիծաղելի վարկած է: Չգիտեմ, մարդիկ երևի պարապ են, մտածում են՝ այդպիսի վարկածներով հանրությանը զվարճացնեն»:

Ավելի վաղ հայտնի դարձավ, որ օգոստոսի 19-ին «Ձյունիկ սառնարանում» բռնկված հրդեհը կասկածներ է առաջացրել հրդեհից տուժած գործարարների մոտ: Այդ մասին լրագրողների հետ հանդիպմանն ասել է «Արմեն-Համիկ եղբայրներ» ընկերության տնօրեն Արմեն Անդրեասյանը, որի ընկերությունը սառնարաններում ունեցել է ներկրված սառեցված թռչնամիս, տավարի ու խոզի միս: