Փաշինյանի առաջարկը երևանցիներին՝ պատշգամբները զարդարել անկախության մոտիվներով

PanARMENIAN.Net - ՀՀ վարչապետ Նիկոլ Փաշինայնն իր ֆեյսբուքյան էջում հիշեցրել է, որ Անկախության օրվա գլխավոր տոնակատարությունները որոշվել է տեղափոխել Գյումրի, իսկ երևանցիներին առաջարկել է փողոցներին նայող պատշգամբները զարդարել անկախության մոտիվներով:

«Սեպտեմբերի 21-ին բոլորով գնում ենք Գյումրի. հիշեցնեմ, որ այս տարվանից մեկնարկում ենք Անկախության տոնակատարությունների գլխավոր միջոցառումը մարզերում անելու գործընթացը: Առաջին նման միջոցառումը տեղի կունենա ս/թ սեպտեմբերի 21-ին Գյումրիում:Կառավարության աշխատակազմը խոստանում է անմոռանալի միջոցառում, իսկ նախորդ տարվա փորձը ցույց տվեց, որ կարող են այդ խոստումն ի կատար ածել:

Ու որպեսզի տոնը չհեռանա Երևանից և մյուս քաղաքներն էլ տոնական տեսք ունենան, կարծում եմ արժե, որ մեր այն քաղաքացիները ովքեր հավես ունեն, փողոցներին նայող իրենց պատշգամբները զարդարեն՝ անկախության մոտիվներով: Նույնիսկ լավագույն շենքի մրցույթ անելու գաղափար կա: Շենքը տոնական դարձնելու ամենապարզ ճանապարհը պատուհանից կամ պատշգամբից ՀՀ պետական դրոշը պարզելն է. դե իհարկե՝ խնամված, տեսքը տեղը դրոշների մասին է խոսքը:)»,-ասվում է գրառման մեջ: