ORSIS-ը փորձել է ռազմականի փոխարեն որսորդական սարքեր մատակարարել ՊՆ-ին

4 նոյեմբերի 2019 - 16:28 AMT

PanARMENIAN.Net - «Ունիկում Ինժիներինգ» ՍՊԸ-ն, որը տարիներ շարունակ ՀՀ պաշտպանության նախարարությանը մատակարարել է գիշերային տեսադիտման հատուկ սարքեր, բացահայտել և պաշտպանության նախարար Դավիթ Տոնոյանին է փոխանցել ORSIS ընկերության առաջարկած գիշերային տեսադիտման սարքերի և ջերմատեսիլ նշանոցներում առկա տեխնիկական խնդիրները: Այս մասին հաղորդել է Factor.am-ը՝ հղում անելով իր տրամադրության տակ հայտնված փաստաթղթերին:

ORSIS ընկերությունը ռուսական «Промтехнологии» կոնցեռնի մասն է կազմում, իսկ Հայաստանում ընկերության պաշտոնական ներկայացուցիչը «Օրսիս Արմս» ՍՊԸ-ն է: Այս ՍՊԸ-ն հիմնադրվել է 2017 թվականին: Հիմնադիրներն են Արթուր Գալստյանն ու Գևորգ Մանուկյանը: Արթուր Գալստյանը ՀՀ զինված ուժերի գլխավոր շտաբի ռազմատեղագրական բաժնի պետն է, փոխգնդապետ է։ Իսկ Գևորգ Մանուկյանը նախկինում զբաղեցրել է նույն պաշտոնը, ինչ Արթուր Գալստյանը:

Մասնավորապես, նշվում է, որ ORSIS-ը ռազմականի փոխարեն ՊՆ-ին փորձել է մատակարարել որսորդական տեսադիտման սարքավորումներ, ինչը զինվորների կյանքի համար կարող է սպառնալիք լինել, քանի որ ռազմական տեսադիտման սարքավորումները զինվորներին քողարկելու կարևորագույն ֆունկցիա ունեն, ինչը բացակայում է որոսորդականների մոտ:

Հրապարակման մեջ նշվում է նաև, որ ՊՆ-ն ռազմական տեսադիտման 500 սարքավորման հայտ է ներկայացրել, որից յուրաքանչյուրի համար, ORSIS ընկերությունը սահմանել է 3.1 մլն դրամ: Այսինքն՝ յուրաքանչյուրի համար 600,000 դրամով ավելի թանկ: Այս գնով ՊՆ-ն 500 սարքավորման համար պետք է վճարեր 1.9 մլրդ դրամ: Սակայն գործարքը մայիսից կասեցվել է՝ բացահայտված խախտումների պատճառով: ORSIS ընկերության փաստաբան Ալեքսանդր Սիրունյանը հերքել է այս լուրերը:

Նոյեմբերի 4-ին ԱԺ-ում պատասխանելով ORSIS-ի հետ կապված հարցին, պաշտպանության նախարար Դավիթ Տոնոյանն ասել էր, որ հանցավոր արարք է եղել, բայց թե ում կողմից և ինչ ծավալի՝ կպարզեն քննչական մարմինները։

Կապված իրեն փոխանցված փաստաթղթերի հետ՝ նախարարն արձագանքել է. «Այո, բայց դա ոչ թե փորձաքննություն է եղել, այլ գնումների գործընթացի ժամանակ մատնանշվել է մեկ կազմակերպությանն առավելություն տալու փաստը»:

2019-ի օգոստոսին պաշտպանության նախարարությունը հրաժարվել է ընդունել ORSIS-ի մի քանի միլիոն դոլարի գիշերային տեսադիտման հատուկ սարքերը: Արդյունքում ընկերության հայաստանյան ներկայացուցչությունը դիմել էր ՀՀ քննչական կոմիտե, ինչի հիման վրա քրեական գործ էր հարուցվել ՀՀ Քրեական օրենսգրքի 376-րդ հոդվածի 1-ին մասով նախատեսված հանցագործության («Ծառայության նկատմամբ պետի կամ պաշտոնատար անձի անփույթ վերաբերմունքը») հատկանիշներով։

Հղումներ թեմայով.

«Եղել է հանցավոր արարք»․ ո՞վ և ի՞նչ նպատակով է փորձել ռազմականի փոխարեն որսորդական ռազմամթերք մատակարարել ՀՀ ՊՆ-ին. ОRSIS-ի գործով նոր մանրամասներ