Ըստ Թորոսյանի՝ օրենքի քննադատները նենգափոխում են առողջության հարկի գաղափարը

PanARMENIAN.Net - Առողջության համապարփակ ապահովագրության ներդրման շուրջ դիսկուրսը մանիպուլյացիաների է ենթարկվում և նենգափոխվում: Այս մասին ֆեյսբուքյան իր էջում գրել է առողջապահության նախարար Արսեն Թորոսյանը՝ ի պատասխան նախագծի մասին հնչող բացասական կարծիքների և քննադատության:

«Առողջության ապահովագրության (ապահովության) համար գանձվող գումարը միևնույնն է ծախսվում է հենց ձեր գրպանից և պետությունը նոր հարկատեսակով որևէ եկամուտ չի ակնկալում։ Բոլորը հենց հիմա բժշկական ծախսեր են անում և հաճախ այնպիսի ծախսեր, որ բերում են ընտանիքների աղքատացման»,- գրել է նախարարը՝ նշելով, որ անհրաժեշտ է կարդալ հայեցակարգն ամբողջությամբ։

Թորոսյանի խոսքով՝ համակարգի ներդրումը պաշտպանելու է հենց քաղաքացուն և՛ առողջ ու երիտասարդ, և՛ ոչ այնքան առողջ և ոչ այնքան երիտասարդ տարիքում։

ՀՀ առողջապահության նախարարության կողմից առաջարկվող նոր հարկատեսակով նախատեսվում է 4-6% առողջության հարկ սահմանել: Որպես նախագծի հիմնավորում նշվում է, որ ֆինանսական պատճառներով բնակչության շուրջ 20%-ը չի հաճախում առողջության առաջնային պահպանման բժշկի, իսկ նախագծի ներդրմամբ կստեղծվի առողջապահության ֆինանսավորման կայուն համակարգ: ԱՆ-ից հիմնավորել են, որ նախնական հաշվարկներով, աշխատող բնակչության 41%-ից ավելիի համար առողջության հարկը չի դառնա լրացուցիչ բեռ։ Մնացած 59% աշխատողների համար առողջության հարկի ներդրումը մեղմվում է եկամտահարկի համահարթեցման արդյունքում՝ եկամտահարկի չափի նվազման միջոցով:

Ըստ նախարարության հիմնավորման՝ հարկի սահմանումը 4-6%-ի չափով զգալի բացասական ազդեցություն չի ունենա աշխատողների եկամուտների վրա: Նախարար Թորոսյանը նշել է, որ 2020թ.-ի բյուջեով պետպատվեր բուժծառայությունների համար պետությունը հատկացրել է 109 մլրդ դրամ, սակայն բոլոր քաղաքացիներին անվճար բուժօգնությամբ ապահովելու համար անհրաժեշտ է շուրջ 250 մլրդ։

Նոր հարկատեսակի մասին քննարկումները բացասական արձագանքի են արժանացել:Մասնավորապես նշվում է, որ Հայաստանում արդեն մասամբ ձևավորված է առողջապահական ապահովագրության կամավոր համակարգը, և սա լրացուցիչ բեռ է աշխատող քաղաքացու համար: Նշվում է, որ պարտադիր համակարգի ներդրման պայմանում քաղաքացիները կարող են հրաժարվել կամավորից, բժշկական հաստատությունները հնարավոր է թանկացնեն ծառայությունների արժեքը: