ՀՀ-ում դիմակների ավելցուկ է հնարավոր․ Վարչապետի կոչը՝ գործարանային դիմակներ կրել, դրանք արդյունավետ են

PanARMENIAN.Net - Այս պահին Հայաստանում առկա դիմակներն այնքան շատ են, որ շուկայում կարող է ավելցուկ առաջանալ, հայտարարել է ՀՀ տնտեսական մրցակցության պաշտպանության պետական հանձնաժողովի նախագահ Գեղամ Գևորգյանը։

«Քանի որ դիմակները մի 2 ամիս առաջ են ներկրվել, ավելի թանկ են, տեղական արտադրության դիմակների արժեքը 60 դրամ է, ու հիմա ունենք դիմակների պրոֆիցիտ: Այսինքն՝ ավելի շատ դիմակ ունենք, քան վաճառվում է»,- ասաց Գևորգյանը:

Նա նշել է, որ տեղական արտադրության 60 դրամանոց դիմակների առաջին խմբաքանակն արդեն արտահանվել է: Իսկ 2-րդ խմբաքանակի արտահանման համար կառավարությունը պետք է որոշի՝ եթե թույլ տա էժան դիմակների արտահանումը, ապա շուկայում կմնան ներկրված ավելի թանկերը: Ըստ Գևորգյանի՝ հակառակ դեպքում՝ շուկայում կառաջանա դիմակների ավելցուկ, ու ներկրվածները չեն վաճառվի:

Այս խնդրի լուծման համար վարչապետ Նիկոլ Փաշինյանը քաղաքացիներին կոչ է արել կրել բացառապես գործարանային արտադրության դիմակներ:

«Ըստ էության, երբ մենք այսօր նայում ենք շուկայում դիմակների սպառման ծավալները, մեզ պետք չէ անգամ գնալ, փողոցում մոնիթորինգ անել: Մենք տեսնում ենք` ամեն օր երկրում քանի դիմակ է սպառվում, և մեզ համար ակնհայտ է, որ մեր սիրելի քաղաքացիների մեծամասնությունը համենայնդեպս, գործարանային արտադրության դիմակ չի կրում»,- ասաց վարչապետը՝ հավելելով, որ դրանք իրենց կանխարգելիչ նշանակությամբ ավելի արդյունավետ են:

Հայաստանում հուլիսի 2-ի դրությամբ կորոնավիրուսով վարակի դեպքերը հասել են 26,658-ի։ Ընդհանուր առմամբ, կորոնավիրուսից մահվան 459 դեպք կա, այլ պատճառով՝ 153։ Առողջացածների ընդհանուր թիվը 15,036 է։ Փաստացի բուժվողների թիվը 11,010 է։