Գիտնականներ․ Վարակումից հետո կորոնավիրուսի դեմ իմունիտետը կարող է մի քանի ամսում անհետանալ

PanARMENIAN.Net - King’s College London համալսարանի հետազոտողները հակամարմինների կտրուկ նվազում են նկատել 3 ամիս առաջ կորոնավիրուսով վարակվածների մոտ, գիտնականները ենթադրում են, որ կորոնավիրուսը կարող է դառնալ սեզոնային հիվանդություն, փոխանցում է Inc-ը։

Հետազոտողներն ուսումնասիրել են 100-ից ավելի պացինետի իմունային պատասխանները և հայտնել, որ վարակվելուց հետո կորոնավիրուսը ոչնչացնող հակամարմինների արդյունավետությունը պիկին է հասել սիմպտոմների հայտանբերումից 3 շաբաթ անց, ապա սկսել է արագորեն նվազել։

Արյան անալիզները ցույց են տվել, որ պացինետներից 60%-ի մոտ իմունային ուժեղ պատասխան է ձևավորվել վիրուսի դեմ, սակայն երեք ամիս անց նրանց միայն 17%-ի մոտ է արդյունքը պահպանվել։

Հետազոտվածների մոտ հակամարմինների մակարդակը 23 անգամ նվազել է, իսկ որոշ դեպքերում գիտնականներին դրանք գտնել չի հաջողվել։

Եթե հակամարմինները կորոնավիրուսի դեմ պայքարի հիմնական միջոցներն են, ապա, ինչպես ենթադրում են հետազոտողները, մարդիկ կարող են վարակվել սեզոնային ալիքներով և պատվաստանյութը չի կարող նրանց երկար ժամանակ պաշտպանել։ King’s College London-ի գիտնականներն առաջինն են աշխարհում, որոնք հետազոտել են պացինետների մոտ հակամարմինների առկայությունը վարակվելուց 3 ամիս անց։

Գիտնականների կարծիքով՝ ձմռանը կորոնավիրուսի նոր ալիք է սպասվում։ Հուլիսի 15-ի դրությամբ ամբողջ աշխարհում կորոնավիրուս հաստատվել է 13.3 մլն-ից ավելի մարդու մոտ։