Ֆրանսիայի միանգամից մի քանի քաղաքում թուրքերը հայերի որս են սկսել

PanARMENIAN.Net - Արցախի դեմ թուրք-ադրբեջանական պատերազմի հետևանքով Ֆրանսիայում սրվել են թուրք-հայկական համայնքի հարաբերությունները։ Մասնավորապես, ֆրանսահայերը բախվում են թուրք ազգայնականների ատելության խոսքին և մահվան սպառնալիքներին։ Վտանգված է նրանց ֆիզիկական անվտանգությունը։

Հոկտեմբերի 28-ի գիշերը Ֆրանսիայի Լիոն քաղաքում թուրքերը հայերի որս են հայտարարել։ Ցույցի ժամանակ թուրքական դրոշով մարդիկ բղավել են՝ «ուր եք հայեր» և հայհոյել։

Ցույցին մասնակցել է մոտ 200 մարդ, նրանք հարձակվել են նաև ոստիկանական մեքենայի վրա, կոտրել ապակին, փորձել թիրախավորել հայկական խանութներն ու սրճարանները:

Թուրքերի ագրեսիայից չեն խուսափել նաև Դիժոն քաղաքի հայերը։ Հայատյաց ցույց է արվել նաև Ֆրանսիայի մեկ այլ քաղաքում՝ Վիենում։ Մի քանի հարյուր թուրք գիշերով քայլարշավի ժամանակ բղավել է «Մահ հայերին»։

Հոկտեմբերի 20-ին Վիենի համայնքային խորհուրդը միաձայն ընդունել էր Արցախի Հանրապետության ճանաչման բանաձևը:

Ֆրանսիայում ՀՀ դեսպանությունը կոչ է անում այդ երկրում բնակվող հայերին չտրվել որևէ սադրանքի՝ հավատարիմ մնալով տեղի օրենսդրության պահանջներին։ Նույն կոչն անում է նաև Սփյուռքի գլխավոր հանձնակատարի գրասենյակը՝ նշելով, որ անհրաժեշտ է գործակցել տեղական իրավապահ մարմինների հետ:

Հոկտեմբերի 28-ի առավոտյան Ֆրանսիայի Վալանս տանող ավտոմայրուղու վրա Արցախի ճանաչմանն ուղղված խաղաղ ակցիայի ընթացքում թուրքերի մի խումբ դանակներով, մահակներով և մուրճերով հարձակվել էր հայ ցուցարարների վրա։ Վիրավորվել էր մեկ տասնյակ հայ։

Ադրբեջանը սեպտեմբերի 27-ի վաղ առավոտյան Արցախի ուղղությամբ սկսել է օդային և հրթիռային հարձակում՝ թիրախավորելով թե ռազմական օբյեկտներ, թե քաղաքացիական ենթակառուցվածքներ, այդ թվում՝ Ստեփանակերտում։ ՀՀ-ում և Արցախում ռազմական դրություն է հայտարարված։