Ռուսաստանն ու Հայաստանը ամբողջական ծավալով իրացնում են ռազմատեխնիկական գործակցության ծրագիրը։ Այդ մասին հայտարարել է ՌԴ ռազմատեխնիկական գործակցության դաշնային ծառայության մամուլի քարտուղար Վալերի Ռեշետնիկովը՝ հավելելով, որ իրենք չեն բացառում նաև ռուսական արտադրության ԱԹՍ-ների մատակարարումը ՀՀ-ին։
«Այսօրվա դրությամբ մենք արտահանման ենք ներկայացնում մի շարք անօդաչու թռչող սարքեր, մասնավորապես, տևական թռիչքի հնարավորությամբ «Օրիոն-Է» անօդաչու թռչող սարքերը։ Հայկական կողմի համապատասխան դիմումի դեպքում մենք պատրաստ ենք քննարկել այն ընդունված կարգով»,- ասել է Ռեշետնիկովը, գրում է ՏԱՍՍ-ը։
Նա հավելել է, որ Հայաստանը շարունակում է մնալ ՌԴ ավանդական գործընկերը ռազմատեխնիկական ոլորտում։
«Նախկինում կնքված պայմանագրերով բոլոր առաքումները կատարվում են ժամանակին և ամբողջական ծավալով»,- ասել է նա։
«Օրիոնը» միջին բարձրության անօդաչու թռչող սարք է տևական թռիչքաժամանակով, որի առավելագույն թռիչքային զանգվածը 1 տ է, իսկ օգտակար բեռի առավելագույն զանգվածը՝ 200 կգ։
Ըստ «Ռոսօբորոնէքսպորտի»՝ անօդաչուն այսօրվա դրությամբ արտահանման է առաջարկվում որպես հետախուզական սարք, իսկ ՌԴ ԶՈւ-ին առաքվում է որպես հարվածային։
