ՄԻՊ․ Ադրբեջանցիները թիրախային կրակել են Երասխի վրա

PanARMENIAN.Net - ՀՀ ՄԻՊ Արման Թաթոյանը, ֆեյսբուքյան էր էջում անդրադառնալով ադրբեջանցիների կողմից Երասխի գնդակոծմանը, նշել է, որ հոկտեբերի 16-ին՝ ժամը 23:00-ի սահմաններում, ադրբեջանական զինված ուժերը թիրախային կրակել են ՀՀ Արարատի մարզի Երասխ համայնքի վրա: Կրակահերթերը եղել են նպատակային՝ քաղաքացիական տների ուղղությամբ:

Նշվում է, որ գնդակոծությունից անմիջապես հրդեհվել է Երասխի բնակչի 3-4 հազար հակ խոտի դեզը: Հրշեջների ժամանակին գալու շնորհիվ է կրակը մեկուսացվել, որ տների ուղղությամբ չտարածվի:

«Սրանք ահաբեկչական հանցավոր արարքներ են: Այս սանձարձակությունները ադրբեջանական իշխանությունների թշնամանքի ու ֆաշիզմի քաղաքականության ուղիղ արդյունքն են: Ադրբեջանական զինծառայողների համար ակնհայտ է, որ իրենք վնաս են տալիս գյուղացիներին, ոչնչացնում են նրանց գույքը, խախտում են նրանց կյանքի ու սեփականության իրավունքը, խաթարում են խաղաղ կյանքն ու անվտանգությունը:

Այս արարքը ևս մեկ անգամ հիմնավորում է, որ պետք կատարվի է Եվրոպայի խորհրդի խորհրդարանական վեհաժողովի (ԵԽԽՎ) 2021թ. սեպտեմբերի 27-ի թիվ 2391 (2021) բանաձևի անվտանգության ապառազմականացված գոտի ստեղծելու պահանջը», - ասվում է գրառման մեջ։

Թաթոյանը նաև հրապարակել է ադրբեջանցիների գնդակոծման հետևանքով բռնկված հրդեհի տեսանյութը: