2020-ին կառավարության շենքում անկարգությունների գործով նախաքննությունը ևս 3 անձի մասով ավարտվել է

22 նոյեմբերի 2021 - 15:16 AMT

PanARMENIAN.Net - ՀՀ ազգային անվտանգության ծառայության քննչական դեպարտամենտում շարունակվող՝ 2020-ի նոյեմբերի 10-ին կառավարության, ԱԺ շենքերում անկարգությունների գործով նախաքննությունը ևս 3 անձի մասով ավարտվել է։

Նրանց նկատմամբ գործն անջատվել է առանձին վարույթում և մեղադրական եզրակացությամբ ուղարկվել Է դատախազին՝ գործը, ըստ էության, քննության առնելու համար դատարան ուղարկելու միջնորդությամբ, տեղեկացնում է ԱԱԾ մամուլի ծառայությունը:

Բազմադրվագ քրեական գործով քրեական հետապնդումներ են հարուցվել զանգվածային անկարգության 53 մասնակցի կամ կազմակերպչի նկատմամբ, որոնցից 27 անձի նկատմամբ անջատվել և մեղադրական եզրակացությամբ դատարան է ուղարկվել 9 քրեական գործ:

Ընդ որում՝ դատարան ուղարկված քրեական գործերի դատաքննության արդյունքներով 7 անձանց վերաբերյալ արդեն իսկ կայացվել են մեղադրական դատավճիռներ, որոնք դատապարտվել են ազատազրկման ձևով պատժատեսակների, իսկ մնացած անձանց մասով դատական քննությունն ընթացքի մեջ է:

Պարզաբանվել են 550-ից ավելի անձանց ինքնությունները, ինչպես նաև ճշտվել են զանգվածային անկարգության այլ մասնակիցների տվյալները, որոնց հայտնաբերման ուղղությամբ իրականացվում են ակտիվ որոնողական աշխատանքներ:

Քրեական գործով շարունակվում են ձեռնարկվել մեծածավալ օպերատիվ-հետախուզական և քննչական գործողություններ՝ զանգվածային անկարգությունների կազմակերպիչների, ունեցած դերակատարության, կատարված հանցագործությունների ամբողջական պատկերի բացահայտման, դեպքի հետ առնչություն ունեցած այլ անձանց ինքնությունները պարզելու և նրանց նկատմամբ քրեական հետապնդումներ սկսելու ուղղությամբ:

2020-ի նոյեմբերի 9-ի լույս 10-ի գիշերը, երբ հայտնի դարձավ, որ արցախա-ադրբեջանական պատերազմի 44-րդ օրը ՌԴ նախագահ Վլադիմիր Պուտինի, ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի միջև ստորագրվել է եռակողմ հայտարարություն, որով դադարեցվում են ռազմական գործողությունները և զգալի տարածքներ են անցնում Ադրբեջանի հսկողության տակ, մի խումբ անձինք, ներխուժելով ՀՀ կառավարության, Ազգային ժողովի շենքեր և ՀՀ վարչապետի կեցավայր, զանգվածային անկարգություններ հրահրեցին: Այդ օրը նաև ծեծի էին ենթարկել ՀՀ Ազգային ժողովի այն ժամանակվա նախագահ Արարատ Միրզոյանին։