Մուրադյան․ Անհայտ ծագումնաբանության սուր, ծանր հեպատիտների դեպքերը երեխաների շրջանում աճում են

PanARMENIAN.Net - Երևանի պետական բժշկական համալսարանի ռեկտոր Արմեն Մուրադյանը ֆեյսբուքյան իր էջում տեղեկացրել է, որ անհայտ ծագումնաբանության սուր, ծանր հեպատիտների դեպքերը երեխաների շրջանում աճում են։

Նա նշել է, որ «Հերացի» վերլուծականը «Մուրացան» հիվանդանոցային համալիրի ինֆեկցիոն ծառայության հետ համատեղ ամփոփել է երեխաների շրջանում նկատվող անհայտ ծագումնաբանության սուր, ծանր հեպատիտների դեպքերի մասին ներկայումս հայտնի փաստերը:

«Ապրիլի 5-ին Միացյալ Թագավորությունը Առողջապահության համաշխարհային կազմակերպությանն է հայտնել նախկինում առողջ, մինչև 10 տարեկան երեխաների շրջանում անհայտ ծագումնաբանության սուր, ծանր հեպատիտների դեպքեր մասին: Առաջին դեպքերից մոտ մեկ ամիս անց՝ 2022-ի մայիսի 5-ի դրությամբ, Եվրոպական Միության 15 երկրում արձանագրվել է հիվանդության մոտ 95 դեպք, ևս 145-ը գրանցվել է Միացյալ Թագավորությունում: Հիվանդությունը գրանցվել է նաև ԱՄՆ-ում և Իսրայելում:

Անհայտ ծագումնանաբության սուր, ծանր հեպատիտների բնորոշ ախտանշաններն են՝ աղեստամոքսային տրակտի խանգարումներ, որոնց հաջորդում է դեղնուկը (74% դեպքերում), փսխումը (73% դեպքերում), կղանքի գույնի փոփոխությունը (58% դեպքերում), փորլուծությունը (49% դեպքերում) և սրտխառնոցը (39.5% դեպքերում): Ներկայումս գիտնականների կողմից ուսումնասիրվում է հիվանդության առաջացման մի քանի աշխատանքային վարկած.

1. Զուգորդված գործոն, որն ազդում է փոքր երեխաների վրա, ավելի ծանրացնելով սովորական, թեթև ադենովիրուսային վարակները կամ առաջացնելով նրանց մոտ իմունոպաթոլոգիա.

ա) ընկալություն վարակի նկատմամբ, պայմանավորված լոքդաունի պատճառով սեզոնային վարակների ցածր հիվանդացությամբ

բ) նախկինում տարված կամ զուգորդված կորոնավիրուսային հիվանդություն

գ) տոքսիններ, դեղեր կամ շրջակա միջավայրի գործոններ

2. Ադենովիրուսային վարակի նոր տեսակ և այլն.

Վերոնշյալի համատեքստում անհրաժեշտ է իմանալ, որ դեպքերի հանդիպման հաճախականությունը չափազանց ցածր է, դրանց ծագումնաբանության ուսումնասիրություններն ընթացքի մեջ են և անգամ, եթե ադենովիրուսային վարակը ունի դերակատարում, հիվանդությունը հավանաբար չունի մարդուց մարդուն փոխանցվող հիվանդության հատկանիշներ»,-ասվում է գրառման մեջ:

Այնուամենայնիվ, զգոնություն պահպանելու նպատակով, ծնողներին խորհուրդ է տրվում երեխաների մոտ վերոնշյալ ախտանշանների առաջացման դեպքում չզբաղվել ինքնաբուժությամբ, այլ անմիջապես դիմել մասնգետներին, ինչպես նաև խստորեն հետևել հիգիենայի կանոններին (ձեռքերի լվացում, ռեսպիրատոր հիգիենա և այլն), որը նպաստում են բազմաթիվ վարակների տարածման կանխարգելմանը: Կարևոր է նաև հետևել պաշտոնական կամ հեղինակավոր աղբյուրներից ստացված տեղեկատվությանը և հիշել, որ սոցիալական ցանցերում հանդիպող հրապարակումները հաճախ չունեն գիտական հիմնավորում, իսկ որոշ դեպքերում ակնհայտ կեղծ են:

Նշվում է, որ նյութը նախապատրաստելիս օգտագործվել են ԵՄ ՀՎԿԱԿ և ԱՀԿ հրապարակումները: