Այսօր ողջ աշխարհի հայությունը նշում է Հայոց ցեղասպանության 94-րդ տարելիցը

PanARMENIAN.Net - Այսօր, ապրիլի 24-ին, ողջ աշխարհի հայությունը նշում է Հայոց ցեղասպանության 94-րդ տարելիցը: Հենց այս օրը Կոնստանդինոպոլսում սկսվեցին հայ մտավորականության, հոգեւոր, տնտեսական ու քաղաքական վերնախավի զանգվածային ձերբակալությունները, որի արդյունքում ոչնչացվեց հայ մշակույթի ականավոր գործիչների մի ողջ աստղաբույլ: Ձերբակալության եւ ոչնչացման ենթակա ցուցակներում ընդգրկված էին ականավոր գրողներ, դերասաններ, երաժիշտներ, ուսուցիչներ, բժիշկներ, իրավաբաններ, լրագրողներ, գործարարներ, քաղաքական եւ կրոնական առաջնորդներ: Կոնստանդինոպոլսի հայ համայնքի վերնախավի ձերբակալությունները փոքր ընդհատումներով շարունակվում էին մինչեւ մայիսի վերջ, ընդ որում ոչ մի մեղադրանք նրանց չի ներկայացվել: Ընդամենը մի քանի շաբաթվա ընթացքում միայն Կոնստանդինպոլսում շուրջ 800 հայեր ձերբակալվեցին, որոնցից մինչեւ տարեվերջ արդեն քչերն էին ողջ մնացել:



1915-23թթ. սպանվել է շուրջ 1,5 մլն հայ եւ եւս կես միլիոնը սփռվել է աշխարհով մեկ: Հայոց ցեղասպանությունը ճանաչել են Ռուսաստանը, Ֆրանսիան, Կանադայի խորհրդարանի համայնքների պալատը, Լիբանանը, Ուրուգվայը, Կիպրոսը, Արգենտինան, Հունաստանը, Բելգիան, Շվեդիան, Սլովակիան, Նիդերլանդների Ներկայացուցիչների պալատը, Շվեյցարիայի Ազգային խորհուրդը, Վատիկանը, Իտալիայի խորհրդարանի ստորին պալատը, Գերմանիան, Լիտվան, Լեհաստանի սեյմը, ԱՄՆ-ի 42 նահանգներ: