Փաշինյանն ու Կոբախիձեն ռազմավարական գործընկերության օրակարգին վերաբերող հարցեր են քննարկել

PanARMENIAN.Net - Թբիլիսիում տեղի է ունեցել Հայաստանի և Վրաստանի վարչապետներ Նիկոլ Փաշինյանի և Իրակլի Կոբախիձեի առանձնազրույցը: Նրանք քննարկել են երկու երկրների ռազմավարական համագործակցությանը վերաբերող մի շարք կարևոր հարցեր։

Կոբախիձեն շնորհակալություն է հայտնել Հայաստանի գործընկերոջը «Մետաքսի ճանապարհ» 5–րդ համաժողովին մասնակցելու հրավերն ընդունելու համար:

Կողմերն ընդգծել են երկու բարեկամական երկրների միջև քաղաքական ակտիվ երկխոսության փաստը և վստահություն հայտնել, որ այն արդյունավետ կերպով կշարունակվի:

Նիկոլ Փաշինյանը և Իրակլի Կոբախիձեն մտքեր են փոխանակել առևտրատնտեսական, մշակութային ոլորտներում համագործակցությանը վերաբերող հարցերի շուրջ:

Անդրադարձ է կատարվել Հայաստանի և Ադրբեջանի միջև խաղաղության հաստատմանը: Իրակլի Կոբախիձեն մեկ անգամ ևս շնորհավորել է այդ առիթով և համոզմունք հայտնել, որ այն նոր ազդակ կհաղորդի տարածաշրջանային համագործակցությանն ու կայունության ապահովմանը:

Վարչապետ Փաշինյանը մանրամասներ է ներկայացրել տարածաշրջանային հաղորդակցության ուղիների ապաշրջափակմանը միտված TRIPP և «Խաղաղության խաչմերուկ» նախագծերի իրականացման շուրջ:

Ի պատիվ վարչապետ Փաշինյանի՝ Իրակլի Կոբախիձեի անունից տրվել է պաշտոնական ընթրիք:

Իրակլի Կոբախիձեն X սոցիալական ցանցում գրել է․ «Նախքան Մետաքսի ճանապարհի համաժողովը՝ արդյունավետ հանդիպում եմ ունեցել Նիկոլ Փաշինյանի հետ։ Վստահ եմ՝ այն կամրապնդի մեր երկրների միջև համագործակցությունը», հայտնում է «Էխո Կաոկազան»։

https://www.ekhokavkaza.com/a/irakliy-kobahidze-vstretilsya-s-nikolom-pashinyanom/33566091.html

Փաշինյանը ժամանել է Թբիլիսի՝ մասնակցելու Մետաքսի ճանապարհի համաժողովին, որը առաջին անգամ անցկացվել է 2015 թվականին և տեղի է ունենում երկու տարին մեկ։ Հինգերորդ համաժողովի թեման ու կարգախոսն են՝ «Ներդրեք փոխկապակցվածության մեջ՝ զարգացեք կայունության պայմաններում» (Invest in Connectivity – Grow in Stability)։

Սպասվում է, որ համաժողովին կմասնակցի մոտ երկու հազար պատվիրակ՝ բարձրագույն պաշտոնյաներ, բիզնեսի և միջազգային կազմակերպությունների ներկայացուցիչներ, առաջատար գլոբալ ընկերությունների ղեկավարներ և փորձագետներ։ Կքննարկվեն գլոբալ առևտուրը, տրանսպորտը և լոգիստիկան, Միջին միջանցքի զարգացումը, էներգետիկան, թվային փոխակերպումը, ինչպես նաև Վրաստանի ներդրումային միջավայրը։ Համաժողովին ելույթ է ունենալու նաև Ադրբեջանի վարչապետ Ալի Ասադովը։

Երկու տարի առաջ Ասադովը և Փաշինյանը մասնակցել են եռակողմ հանդիպման՝ Վրաստանի այն ժամանակվա վարչապետ Իրակլի Ղարիբաշվիլիի մասնակցությամբ։