Հայաստանում ԱՄՆ նախկին դեսպան Ջոն Էվանսն ավարտում է աշխատանքը Հայոց ցեղասպանության մասին գրքի վրա

PanARMENIAN.Net - Հայաստանում ԱՄՆ նախկին դեսպան Ջոն Մարշալ Էվանսը նոյեմբերի 19-ին կայանալիք գալա-համերգի ժամանակ կստանա 2010թ. «Տարվա պրոֆեսիոնալ» պատվավոր մրցանակը Լոս Անջելեսի Հայկական մասնագիտական ընկերությունից՝ APSLA-ից:

Ինչպես հաղորդում է Armenian Reporter-ը, Էվանսը նշել է, որ երբեք չի ափսոսել այն մասին, որ արտասանել է «ցեղասպանություն» բառը՝ խոսելով Օսմանյան կայսրությունում հայերի կոտորածի մասին: «Այն, ինչ ես ասել եմ, հիմնված է պատմության և 1948թ. Կոնվենցիայի վրա: Ես գիտեի, որ դա բացասական հետևանքներ կունենա: Սակայն, ես ափսոսում եմ, որ այդ բառի պատճառով շատ այլ արտահայտություններ, որ ես արել եմ վերջին տարիներին, ստվերում են մնացել»,-ասել է Էվանսը:

Այժմ Էվանսն ավարտում է Հայոց ցեղասպանության մասին գիրքը, որտեղ ընդգրկվել են նաև հայ-թուրքական արձանագրությունները: «Գիրքը գրեթե ավարտված է, սակայն ես պետք է վերանայեմ «Խորհուրդներ» բաժինը, որտեղ փորձել եմ սահմանել որոշ բաներ, որոնք, ըստ իս, հարկավոր է անել ապահովելու համար լավ ապագա Հայաստանի ու հայերի համար»: