«Նորաձևության ճանապարհ`երկխոսություն սահմանների խաչմերուկում» ծրագրի շրջանակներում հինգ օտարերկրացի մոդելավորողներ կանցեն 10-օրյա ճանաչողական ծրագիր Հայաստանում: Ինչպես լրագրողներին հայտնեց Բրիտանական խորհրդի հայաստանյան գրասենյակի տնօրեն Արևիկ Սարիբեկյանը, մասնակիցները մայիսի 3-5-ի կայանալիք ծրագրի ավարտից հետո տաս օր հնարավորույթուն կունենան հայ մասնակիցների հետ շրջել Հայաստանի տեսարժան վայրերով, լինել թանգարաններում և մշակութային այլ հաստատություններում, և կծանոթանան հայ մշակույթին, հատկապես տարազին:
«Նորաձևության ճանապարհ`երկխոսություն սահմանների խաչմերուկում» ծրագրի շրջանակներում նկարիչ-մոդելավորողները տարազը կդիտարկեն մշակութային համատեքստում և ժամանակակից մոտեցումներն ու տեխնոլոգիաներն օգտագործելով` իրենց հավաքածուների միջոցով յուրովի կմեկնաբանեն երկրների մշակույթն ու ազգային ինքնությունը։
Կձևավորվի հինգ աշխատանքային զույգ, յուրաքանչյուրում մեկական հայ և եվրոպացի նկարիչ-մոդելավորող: Յուրաքանչյուր զույգ կստեղծի չորս մասից բաղկացած հավաքածու: Հավաքածուն կցուցադրվի Երևանում և Հայաստանի չորս մարզերում, այնուհետև մասնակից եվրոպական երկրներում: Հավաքածուի ստեղծման նպատակը Հայաստանում Եվրոպայի և Եվրոպայում Հայաստանի մշակութային արժեքների ու ինքնության, ինչպես նաև պատմության և մշակութային ժառանգության լուսաբանումն է և դրանց վերաբերյալ հասարակության իրազեկումը:
Այն իրականացվում է EUNIC-ի (Եվրամիության մշակութային ազգային կենտրոնների միություն) հինգ անդամ կազմակերպությունների` Բրիտանական խորհրդի, Գյոթեի ինստիտուտի, Ռումինական մշակութային ինստիտուտի, Դանիական մշակութային ինստիտուտի և Չեխական կենտրոնների սերտ համագործակցությամբ: Տեղական գործընկերն է Նորաձևության հայկական խորհուրդը: Ծրագրի հիմնական միջոցառումները, ինչպես նաև հավաքածուի ցուցադրությունը կանցկացվեն ծրագրի գործընկեր Գաֆեսճյան արվեստի կենտրոնում:
