Ստամբուլի դատախազն առաջարկում է Հրանտ Դինքի մարդասպանին 27 տարվա ազատազրկման դատապարտել

17 հունիսի 2011 - 18:52 AMT

PanARMENIAN.Net - Ստամբուլի դատախազ Ալի Դեմիրըպահանջում է հայ-թուրքական «Ակոս» թերթի գլխավոր խմբագիր Հրանտ Դինքի մարդասպան Օգյուն Սամասթին 27 տարվա ազատազրկման դատապարտել: Անչափահասների գործերի Ստամբուլի դատարանում դատավարության ժամանակ դատախազ Ալի Դեմիրը դատավորին խնդրել է ընդունել իր առաջարկը և 19-27 տարվա ազատազրկման մասին վճիռ կայացնել Սամասթին, գրում է թուրքական Today’s Zaman թերթը:

Հայ-թուրքական «Ակոս» թերթի գլխավոր խմբագիր Հրանտ Դինքին սպանել են 2007 թ. հունվարի 19-ին Ստամբուլում` «Ակոս» թերթի խմբագրության առջև: Ավելի քան երկու տարի ձգվող դատավարությունից հետո մարդասպաններն այդպես էլ չդատապարտվեցին: Գործի քնության արդյունքում, նորանոր մանրամասներ են ի հայտ գալիս, մասնավորապես «Էրգենեկոն» ահաբեկչական կազմակերպության մասնակցությունն այդ սպանությանը: Հրանտ Դինքին սպանել է 18-ամյա Օգյուն Սամասթը: Դատական նիստերից մեկի ժամանակ պարզվել էր, որ սպանության անմիջական պատվիրատուն միանգամայն այլ մարդ էր: Հրանտ Դինքի սպանությունից հետո Թուրքիան լքեց Նոբելյան մրցանակի դափնեկիր Օրհան Փամուկը, որին նույնպես սպառնում էին ֆիզիկական հաշվեհարդարով: