Հայաստանում քայլեր են ձեռնարկվում հայերեն ժեստերի լեզվի խնդիրը լուծելու համար

PanARMENIAN.Net - Այսօր` սեպտմբերի 30-ին Ֆրանս-հայկական զարգացման հիմնադրամում բացվեց «Հայերեն ժեստերի լեզվի օրենսդրորեն ճանաչում» կլոր սեղանը:

Ծրագիրը նպատակ ունի խթանել լսողության խանգարումներ ունեցող անձանց հիմնարար իրավունքների` մասնավորապես տեղեկատվության և կրթության իրավունքների պաշտպանությունը:

Կլոր սեղանը բացվեց Վահե Յանի «Երկու ճանապարհ» ֆիլմի դիտումով: Այն պատմում է Հայաստանում լսողության խանգարում ունեցող մարդկանց մասին: Հերոսներից մեկն էլ պարային հեռուստանախագիծներից մեկում հաղթող ճանաչված Հայկն է: Հիմնադրամի ծրագրի ղեկավար Նունե Բալյանը PanARMENIAN.Net ի թղթակցի հետ զրույցում ասաց, որ Հայաստանում ամենամեծ խնդիրը խուլերի մոտ հաղորդակցման խնդիրն է և հայերեն ժեստերի ճանաչման խնդիրն է:

«Այսօր գոյություն ունի հայերեն ժեստերի լեզու, որն ունի իր քերականությունը, բառարանը, սակայն պետությունը այն չի ճանաչում, այնինչ շատ երկրներում այն սահմանադրորեն ճանաչված է: Օրենսդրական ակտերում նշվում է ժեստերի լեզվի մասին, բայց ով պետք է լինի ժեստերի դասավանդող կամ համակարգող, չկա ոչ մի բան: Այսինքն ցանկացած մարդ ով գիտի ժեստերի լեզուն, կարող է թարգմանել: Դա խնդիր է առաջանում է շատ ոլորտներում, օրինակ դատարանում: Հայաստանում չկա ժեստերի լեզվի դասավանդման դպրոց», ասաց Բալյանը: Հիմնադրամում արդեն երեք տարի դասավանդվում է լեզուն, և սովորած մարդիկ կենտրոնի տեղեկանքով կարող են ցանկացած թարգմանություն անել, որն, ըստ ղեկավարի` սխալ է: